ការប្រកួតកីឡាទោចក្រយានជើងឯកថ្នាក់ជាតិ ២០២១ នៅខេត្តសៀមរាបព្រឹកនេះ ចាប់ផ្តើមប្រកួតលើ៣វិញ្ញាសារ

សៀមរាប ៖ ការប្រកួតកីឡាទោចក្រយាន ជ្រើសរើសជើង ឯកថ្នាក់ជាតិប្រចាំឆ្នាំ២០២១ បានចាប់ផ្តើមការប្រកួតជាផ្លូវការហើយនៅព្រឹកថ្ងៃទី១២ ខែមករា ឆ្នាំ២០២២ នៅខាងមុខសួនព្រះអង្គចេកព្រះអង្គចម ខេត្តសៀមរាប។ ដោយមានការអញ្ជើញចូលរួមលើកទុងបញ្ជាចេញដំណើរពីសំណាក់ឯកឧត្តម កឹម សុខុន រដ្ឋលេខាធិការ ក្រសួងពាណិជ្ជកម្ម និងជាអនុប្រធានសហព័ន្ធខ្មែរកីឡាទោចក្រយាន តំណាងឯកឧត្តម ប៉ាន សូរស័ក្តិ ប្រធានសហព័ន្ធខ្មែរកីឡាទោចក្រយាន ។

ឯកឧត្តម កឹម សុខុន ថ្លែងថា ក្រោមគម្រោងថវិកាគាំទ្ររបស់ក្រសួងអប់រំ យុវ ជន និងកីឡា ដើម្បីអភិវឌ្ឍន៍វិស័យកីឡាជាតិឆ្ពោះទៅប្រកួត កីឡាស៊ីហ្គេម លើកទី៣២ ឆ្នាំ២០២៣ ដែលព្រះរាជាណាចក្រកម្ពុជាធ្វើជាម្ចាស់ផ្ទះ សហព័ន្ធខ្មែរកីឡាទោចក្រយាន សហការជាមួយសាលាខេត្តសៀមរាប រៀបចំការប្រកួតកីឡាទោចក្រយានជ្រើសរើសជើងឯកថ្នាក់ជាតិ ប្រចាំឆ្នាំ២០២១ ដើម្បីជ្រើសរើសកីឡាករ-កីឡាកាវិនីឆ្នើមប្រចាំឆ្នាំ សម្រាប់ហ្វឹកហាត់បំប៉នសមត្ថភាព ដើម្បីត្រៀមចូលរួមការប្រកួតកីឡាស៊ីហ្គេមឆ្នាំ២០២៣ និងការត្រៀមលក្ខណៈចូលរួមការប្រកួតអន្តរជាតិនានា។

សូមបញ្ជាក់ថា សម្រាប់ការប្រកួតទោចក្រយាន ជ្រើសរើសជើង ឯកថ្នាក់ជាតិប្រចាំឆ្នាំ២០២១ នៅព្រឹកនេះចាប់ផ្តើមប្រកួតលើវិញ្ញាសា កង់គួកបុរសឈុតធំ (Elite), កង់គួកបុរសថ្នាល (Junior) កង់គួកបុរស (Master)។ ចំណែកនៅពេលរសៀល ព្រឹត្តិការណ៍នេះនឹងបន្តរៀបចំការប្រកួតលើវិញ្ញាសា កង់ភ្នំ ដែលមានវិញ្ញាសា កង់ភ្នំថ្នាល កង់ភ្នំនារី កង់ភ្នំបុរស ដែលប្រកួតនៅឧស្សានភ្នំគូលែន (ជើងភ្នំហ៊ប់) ភូមិបន្ទាយស្រី ឃុំឃ្នាសណ្តាយ ស្រុកបន្ទាយស្រី ខេត្តសៀមរាប៕

អត្ថបទ ៖ King of cows