្រុមជម្រើសជាតិហ្វូតសាលកម្ពុជាទៅដល់ថៃ ត្រៀមប្រកួត AFF Futsal Championship 2022
ក្រុមជម្រើសជាតិបាល់ទាត់ក្នុងសាលបានធ្វើដំណើរទៅដល់ទីក្រុងបាងកក ប្រទេសថៃហើយ កាលពីល្ងាចថ្ងៃទី៣០ ខែមីនា ឆ្នាំ២០២២ ដើម្បីត្រៀមចូលរួមប្រកួត AFF Futsal Championship 2022 ពីថ្ងៃទី២ដល់ថ្ងៃទី១០ ខែមេសា ឆ្នាំ២០២២។
ព្រឹត្តិការណ៍នេះមាន៩ក្រុមចូលរួម និងចែកជាពីរពូល ដោយក្រុមជម្រើសជាតិកម្ពុជា ស្ថិតនៅក្នុងពូល A ជាមួយក្រុមខ្លាំងៗ៤ទៀត រួមមាន ម្ចាស់ផ្ទះ ថៃ ម៉ាឡេស៊ី ឥណ្ឌូណេស៊ី និងប្រ៊ុយណេ ខណៈ៤ក្រុមក្នុងពូល B រួមមាន វៀតណាម មីយ៉ាន់ម៉ា ទីម័រខាងកើតនិងអូស្ត្រាលី។
គួរបញ្ជាក់ថា ក្រុមកម្ពុជានឹងត្រូវប្រកួតបើកឆាកមុនគេជាមួយក្រុមជម្រើសជាតិម៉ាឡេស៊ី វេលាម៉ោង ១៥:០០ ថ្ងៃទី២ ខែមេសា និងបន្តប៉ះម្ចាស់ផ្ទះ ថៃ វេលាម៉ោង ១៧:00 ថ្ងៃទី៣មេសា ខណៈ២ប្រកួតចុងក្រោយ កម្ពុជាប៉ះប្រ៊ុយណេ ថ្ងៃទី៤មេសា និងប៉ះឥណ្ឌូណេស៊ី នាថ្ងៃទី៦មេសា នៃវគ្គសន្សំពិន្ទុក្នុងពូល A៕