សិក្ខាកាមជាគ្រូបង្វឹក ទទួលបានការបណ្តុះបណ្តាល ត្រៀមមុនការប្រកួតកីឡាយុទ្ធគុនចម្រុះ «ពានរង្វាន់សម្តេចបវរធិបតី» រដូវកាលទី២ ខាងមុខ

តាមរយៈគណៈកម្មការចំពោះកិច្ចរៀបចំការប្រកួតកីឡាយុទ្ធគុនចម្រុះខ្មែរបុរាណ «ពានរង្វាន់សម្ដេចបវរធិបតី» ដឹកនាំដោយឯកឧត្តមបណ្ឌិតទេសរដ្ឋមន្ដ្រី ថោង ខុន ជាប្រធាន សហព័ន្ធកីឡាយុទ្ធគុនចម្រុះកម្ពុជាបានរៀបចំវគ្គសិក្ខាសាលាបច្ចេកទេសយុទ្ធគុនចម្រុះខ្មែរបុរាណ ជាលើកទី១ជូនដល់គ្រូបង្វឹកកីឡាយុទ្ធគុនបុរាណខ្មែរចំនួន ៧០នាក់ នៅសាលាកីឡាគុណធម៌ រាជធានីភ្នំពេញ ដើម្បីរៀបចំការប្រកួតកីឡាយុទ្ធគុនចម្រុះខ្មែរបុរាណ លើកទី២ នាខែតុលា ឆ្នាំ២០២៥ ។

ឯកឧត្តម វ៉ាត់ ចំរើន រដ្ឋលេខាធិការ ក្រសួងអប់រំ យុវជន និងកីឡា និងជាអនុប្រធានអចិន្ដ្រៃយ៍ គណៈកម្មការចំពោះកិច្ចរៀបចំការប្រកួតកីឡាយុទ្ធគុនចម្រុះខ្មែរបុរាណ «ពានរង្វាន់សម្ដេចបវរធិបតី» បានថ្លែងក្នុងពិធីបើកវគ្គថា សិក្ខាសាលានេះ មានរយៈពេល ៣ថ្ងៃ ចាប់ពីថ្ងៃទី០៩-១១ ខែមករា ឆ្នាំ២០២៥ ដែលរៀបចំឡើង ក្រោយទទួលបានការអនុញ្ញាត និងអនុសាសន៍ណែនាំដ៏ខ្ពង់ខ្ពស់ពីសម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា ដើម្បីពង្រឹងសមត្ថភាព និងបច្ចេកទេសគ្រូបង្វឹកមកពីគ្រប់យុទ្ធគុនខ្មែរបុរាណទូទាំងប្រទេស ដើម្បីត្រៀមរៀបចំការប្រកួតកីឡាយុទ្ធគុនចម្រុះខ្មែរបុរាណ «ពានរង្វាន់សម្ដេចបវរធិបតី» លើកទី២ នាថ្ងៃទី១៦-១៩ ខែតុលា។

ឯកឧត្តម វ៉ាត់ ចំរើន បន្ថែមថា ការរៀបចំសិក្ខាសាលាបច្ចេកទេសលើកទី១នេះ គឺមានគោលបំណងចម្បង ក្នុងការពង្រឹងគុណភាពបច្ចេកទេស ស្មារតី និងក្រមសីលធម៌របស់គ្រូបង្វឹកកីឡាយុទ្ធគុនខ្មែរ ក្រោមការយកចិត្តទុកដាក់ដ៏ខ្ពង់ខ្ពស់បំផុត និងចក្ខុវិស័យដ៏វែងឆ្ងាយរបស់សម្ដេចធិបតីនាយករដ្ឋមន្ដ្រី ក្នុងការពង្រឹងសមត្ថភាព និងគុណភាពរបស់យុទ្ធគុនខ្មែររបស់យើង ដើម្បីអនាគតនៃយុទ្ធគុនព្រលឹងជាតិរបស់យើង ។

តាមរយៈការចិត្តទុកដាក់នេះ អ្នកជំនាញរបស់យើងទាំងអស់គ្នា បានយកចិត្តទុកដាក់ និងខិតខំប្រឹងប្រែង ក្នុងការធ្វើការងារដោយការទទួលខុសត្រូវខ្ពស់ ស្របតាមឆន្ទៈ និងអនុសាសន៍ណែនាំដ៏ខ្ពង់ខ្ពស់បំផុតរបស់សម្ដេចបវរធិបតី និងចេញជាលទ្ធផលជាស្ដែង។ចំពោះសិក្ខាសាលាលើកដំបូង គឺផ្ដោតចង់ឲ្យគ្រូបង្វឹកទាំងអស់ ចេះពីទ្រឹស្ដីកីឡាករ និងការរៀបចំផែនការហ្វឹកហាត់ត្រឹមត្រូវ ពិសេសការហ្វឹកហាត់បច្ចេកទេស និងរបៀបរៀបចំកម្លាំងកាយរបស់កីឡាករ ត្រូវមានភាពធន់ ច្បាស់លាស់ និងបរិបូរណ៍ សម្រាប់ការប្រកួត ក៏ដូចជាត្រូវចេះពីបច្ចេកទេសមូលដ្ឋានច្បាស់លាស់ និងបច្ចេកទេសផ្សេងៗទៀត ជាមួយគ្រូបង្វឹកល្អៗប្រចាំប្រទេស ដូចជាលោកបណ្ឌិត សេង ប៊ុនសុង, លោក អ៊ួ តារា, លោក ចាន់ រតនា, លោក ហ៊ុន ចាន់រាជ និងលោក កាង ដែន ពិសិដ្ឋ ជាដើម ដែលជាគ្រូបង្វឹកចម្រុះ និងមានជំនាញខុសៗគ្នា ដើម្បីចែករំលែកដល់សិក្ខាកាមចូលរួមសិក្ខាសាលានេះ។បន្ទាប់ពីបញ្ចប់សិក្ខាសាលាបច្ចេកទេសសម្រាប់គ្រូបង្វឹកកីឡាយុទ្ធគុនខ្មែរបុរាណនេះទៅ ឯកឧត្តម វ៉ាត់ ចំរើន បានបង្ហាញសុទិដ្ឋិនិយមថា សម្រាប់ការប្រកួតពានរង្វាន់សម្ដេចបវរធិបតី លើកទី២ នាខែតុលា ឆ្នាំ២០២៥ នឹងកាន់តែមានភាពល្អប្រសើរ ក្នុងគ្រាដែលគ្រប់ភាគីពាក់ព័ន្ធទាំងអស់មានពេលវេលាគ្រប់គ្រាន់ ដើម្បីរៀបចំ និងត្រៀមខ្លួន ពិសេសការសិក្សាស្វែងយល់ពីបទបញ្ជាការប្រកួត ក៏ដូចជាបទបញ្ជាបច្ចេកទេសផ្សេងៗ។ អ្នកជំនាញរូបនេះ ជឿជាក់យ៉ាងមុតមាំថា ការប្រកួតឆ្នាំ២០២៥នេះនឹងធ្វើឱ្យគម្លាតបច្ចេកទេសរវាងកីឡាករនីមួយៗមានភាពល្អប្រសើរ និងប្រហាក់ប្រហែលគ្នា សម្រាប់ការប្រកួតរដូវកាលទី២នេះ ដែលអាចទាក់ទាញការចូលរួមទស្សនា និងគាំទ្រកាន់តែច្រើនផុសផុលថែមទៀត៕