លោក ដួង មាសចំរើន មើលឃើញការចូលរួមលេងកីឡាអត្តពលិកម្មច្រើន នឹងជួយលើកកម្ពស់គុណភាពកីឡាករតំណាងសាលា និងជម្រើសជាតិនាពេលអនាគត

ភ្នំពេញ៖ ក្នុងនាមជាប្រធានសហព័ន្ធអត្តពលិកកម្មកម្ពុជា លោក ដួង មាសចំរើន បានលើកឡើងថា ការប្រកួតស្វែងរកជើងឯកអត្តពលកម្មដែលរៀបចំដោយសាលាឯកជនឆ្នាំនេះ បានឃើញមានការចូលរួមកាន់តែច្រើនជាងមុន ដែលបង្ហាញពីសក្តានុពលខ្ពស់នៃកីឡាអត្តពលិកកម្ម ដែលជាប្រភេទកីឡាស្ថិតនៅក្នុងព្រឹត្តិការណ៍អូឡាំពិក។ យោងតាមការវាយតម្លៃរបស់លោក ការចូលរួមបែបនេះអាចជួយលើកកម្ពស់គុណភាពកីឡាករ-កីឡាការិនី តំណាងសាលា និងជម្រើសជាតិនាពេលអនាគត។

ការលើកឡើងរបស់ លោក ដួង មាសចំរើន ប្រធានសហព័ន្ធអត្តពលិកកម្មកម្ពុជា ក្រោយបិទបញ្ចប់ការប្រកួតកីឡាអត្តពលកម្មជម្រើសជើងឯកវិទ្យាស្ថាន ខេមអេដ នាថ្ងៃទី២៣ ខែកុម្ភៈ ឆ្នាំ២០២៥ នៅពហុកីឡដ្ឋានជាតិអូឡាំពិក ។

លោក ដួង មាសចំរើន បានអោយដឹងថា សហព័ន្ធអត្តពលិកកម្មកម្ពុជា មានយុទ្ធសាស្ត្រលើកទឹកចិត្តអោយគ្រប់ស្ថាប័នរួមចំណែកលើការអភិវឌ្ឍវិស័យកីឡា ដោយជំរុញអោយសាលារៀន និងក្រសួងអប់រំអនុវត្តការអប់រំកីឡានៅក្នុងកម្មវិធីសិក្សា។ លោកបានអោយដឹងថា កីឡាមិនត្រឹមតែជួយសុខភាពប៉ុណ្ណោះទេ ប៉ុន្តែមានអត្ថប្រយោជន៍ដល់ការកសាងអាជីពផងដែរ។ ប្រសិនបើកីឡាករមានទេពកោសល្យ និងការប្រឹងប្រែង គេអាចប្រើជំនាញនេះជាអាជីព និងរកចំណូលទ្រទ្រង់ជីវភាពរបស់ខ្លួនទៀតផង។
លោកបានបញ្ជាក់ថា ការរៀបចំការប្រកួតកីឡារបស់សាលានេះអាចជាគំរូល្អសម្រាប់សាលាផ្សេងៗ ឲ្យយកតាម។ លោកសង្ឃឹមថា នាពេលអនាគត នឹងមានសាលាជាច្រើនទៀតរៀបចំការប្រកួតបែបនេះ ដើម្បីជួយលើកកម្ពស់វិស័យកីឡានៅកម្ពុជា។

ក្នុងការប្រកួតនេះ មាន ៨ វិញ្ញាសា ដែលមានចំនួនកីឡាករ និងកីឡាការិនីសរុប ៣៥៣នាក់ចូលរួម។ ចំពោះកីឡាករ-កីឡាការិនី ម្ចាស់ជ័យលាភីទាំងអស់ នឹងមានភារកិច្ចតំណាងសាលា ដើម្បីចូលរួមការប្រកួតជើងឯកថ្នាក់ជាតិ នៅពេលខាងមុខ៕