ចំណេះដឹងការប្រើប្រាស់ព័ត៌មានវិទ្យាសម្រាប់ការស្រង់ទិន្នន័យ និងស្ថិតិកីឡា ជាសមិទ្ធផលថ្មីមួយទៀតរបស់អង្គភាពក្រោមឱវាទអគ្គនាយកដ្ឋានកីឡា

(ភ្នំពេញ)៖ វគ្គបណ្តុះបណ្តាលស្ដីពី «កាប្រើប្រាស់ព័ត៌មានវិទ្យាសម្រាប់ការស្រង់ទិន្នន័យ និងស្ថិតិកីឡា» ដែលបានដំណើររយៈពេល៥ថ្ងៃ បានបញ្ចប់ដោយរលូន និងទទួលបានជោគជ័យ។

លោក ឈុន ចាន់ធូ អគ្គនាយករង នៃអគ្គនាយកដ្ឋានកីឡា បានគូសបញ្ជាក់ថា នេះជាសមិទ្ធផលថ្មីមួយទៀតរបស់អង្គភាពក្រោមឱវាទអគ្គនាយកដ្ឋានកីឡា លើការអភិវឌ្ឍន៍ធនធានមនុស្សប្រកបដោយប្រសិទ្ធភាព។ ហើយអ្វីដែលបានខិតខំប្រឹងប្រែងក្រេបជញ្ជក់នូវពុទ្ធិឌីជីថលតាមបែបប្រព័ន្ធបច្ចេកវិទ្យាទំនើប ពិតជានឹងអាចយកចំណេះ ជំនាញ ដែលបានសិក្សាអស់រយៈពេលប៉ុន្មានថ្ងៃមកនេះ ទៅចែករំលែកនៅតាមអង្គភាពរបស់ខ្លួន និងជាពិសេសទៅទៀតគឺ ចូលរួមអភិវឌ្ឍវិស័យកីឡារបស់យើង ឆ្ពោះទៅការប្រកួតកីឡានានា ទាំងក្នុងប្រទេស និងក្រៅប្រទេសនាពេលខាងមុខ។

លោក អគ្គនាយរងកីឡា បានលើកឡើងទៀតថា ការបណ្ដុះបណ្ដាលធនធានមនុស្សលើចំណេះ និងជំនាញផ្នែកឌីជីថលជូនដល់បុគ្គលិកអប់រំគឺជាតួអង្គមួយដ៏សំខាន់ ដែលយើងទាំងអស់គ្នាត្រូវយកចិត្តទុកដាក់រៀបចំធ្វើបច្ចុប្បន្នភាពជាប្រចាំឱ្យបានទាន់បច្ចេកវិទ្យានៅលើសកលលោកកំពុងមានការអភិវឌ្ឍន៍យ៉ាងសកម្ម។ ការពង្រឹងសមត្ថភាពផ្នែកព័ត៌មានវិទ្យាឱ្យមានការយល់ដឹងរបស់ខ្លួនបន្ថែមទៀត គឺជាការចូលរួម ដើម្បីធានាឱ្យបាននូវការប្រើប្រាស់ព័ត៌មានវិទ្យា ក្នុងការចុះឈ្មោះ និងការងារផ្សេងៗទៀតឱ្យបាននូវគុណភាពសម្រាប់ដំណើរមកដល់ នៃព្រឹត្តិការណ៍កីឡាយុវជនអាស៊ី ឆ្នាំ២០២៩ ដែលកម្ពុជាធ្វើជាម្ចាស់ផ្ទះ។

លោក ឈុន ចាន់ធូ បានគូសរំលេចទៀតថា នៅក្នុងយុគសម័យឌីជីថលនាពេលបច្ចុប្បន្ននេះ ការរួមបញ្ចូលនៃបច្ចេកវិទ្យាព័ត៌មានវិទ្យា (IT) នៅក្នុងកីឡាបានផ្លាស់ប្តូរវិធីដែលទិន្នន័យ និងស្ថិតិត្រូវបានប្រមូល វិភាគ និងប្រើប្រាស់ និងបង្ហាញអំពីសារៈសំខាន់នៃការបញ្ចូលព័ត៌មានវិទ្យាទៅក្នុងវគ្គសិក្សាដែលត្រូវបានរចនាឡើងសម្រាប់សិក្ខាកាមដែលផ្តោតលើទិន្នន័យកីឡា និងការប្រមូលស្ថិតិ។

តាមរយៈការប្រើប្រាស់បច្ចេកវិជ្ជាទំនើប សិក្ខាកាមអាចបង្កើនការយល់ដឹងអំពីការវិភាគទិន្នន័យ កែលម្អដំណើរការធ្វើការសម្រេចចិត្ត និងចុងក្រោយរួមចំណែកដល់ការឈានទៅមុខនៃការអនុវត្ត និងការគ្រប់គ្រងកីឡា បង្កើនការប្រើប្រាស់បច្ចេកវិទ្យាព័ត៌មានវិទ្យា សម្រាប់ការទាញយកទិន្នន័យកីឡា និងស្ថិតិ ដោយផ្តោតលើវិធីសាស្រ្ត ឧបករណ៍ និងការអនុវត្តល្អបំផុតដែលអាចនាំទៅរកការវិភាគកាន់តែត្រឹមត្រូវ និងច្បាស់លាស់៖

១.ប្រើប្រាស់បច្ចេកវិទ្យាព័ត៌មានវិទ្យា ដើម្បីសម្រួលដំណើរការចុះឈ្មោះ ការប្រមូលទិន្នន័យ ដែលអនុញ្ញាតឱ្យចាប់យកទិន្នន័យជាក់ស្តែង និងកាត់បន្ថយលទ្ធភាពនៃកំហុស ដោយធានាថាសិក្ខាកាមរៀនធ្វើ រៀនអនុវត្តព័ត៌មានត្រឹមត្រូវ និងទាន់សម័យ។

២.ប្រើប្រាស់ព័ត៌មានវិទ្យា សិក្ខាកាមអាចស្វែងយល់ពីវិធីសាស្ត្រវិភាគ និងការមើលឃើញទិន្នន័យកាន់តែស៊ីជម្រៅអំពីរង្វាស់នៃការអនុវត្តន៍ និងនិន្នាការ ដែលមានសារៈសំខាន់សម្រាប់ការសម្រេចចិត្តប្រកបដោយការយល់ដឹងនៅក្នុងកីឡា។

៣.បង្កើនបទពិសោធន៍ឱ្យសិក្ខាកាមនូវការប្រើប្រាស់បច្ចេកវិទ្យាព័ត៌មានវិទ្យា និងរៀបចំសម្រាប់អាជីពនាពេលអនាគតក្នុងការវិភាគកីឡាផងដែរ។

៤.បង្កើតកិច្ចសហការ និងការប្រាស្រ័យទាក់ទង ជួយសម្រួលដល់កិច្ចសហការកាន់តែប្រសើរឡើងក្នុងចំណោមសិក្ខាកាម គ្រូបង្វឹក និងអង្គការកីឡា ក្នុងការទំនាក់ទំនងអនុញ្ញាតឱ្យមានការចែករំលែកទិន្នន័យ និងការយល់ដឹងយ៉ាងរលូន ជំរុញបរិយាកាសសហការដែលមានសារៈសំខាន់សម្រាប់ភាពជោគជ័យរបស់ក្រុម។

៥.តាមរយៈការប្រើប្រាស់ព័ត៌មានវិទ្យាក្នុងវគ្គសិក្សា សិក្ខាកាមអាចចូលរួមពីការអនុវត្តជាក់ស្តែងក្នុងការប្រមូលទិន្នន័យកីឡា និងសេណារីយ៉ូការវិភាគជាក់ស្តែង ដើម្បីពង្រឹងចំណេះដឹងទ្រឹស្តី និងបំពាក់ឱ្យសិក្ខាកាមនូវជំនាញដែលត្រូវពូកែក្នុងវិស័យនេះ។

៦.ជាការចាំបាច់សម្រាប់សិក្ខាកាម ដើម្បីបំពេញតម្រូវការនៃឧស្សាហកម្មកីឡាដែលកំពុងវិវឌ្ឍន៍ តាមរយៈការទទួលយកបច្ចេកវិទ្យា ហើយសិក្ខាកាមនឹងមិនត្រឹមតែបង្កើនជំនាញវិភាគរបស់ពួកគេប៉ុណ្ណោះទេ ប៉ុន្តែថែមទាំងទទួលបានការយល់ដឹងដ៏មានតម្លៃចំពោះការអនុវត្តន៍ និងការគ្រប់គ្រងក្រុមកីឡាផងដែរ។

លោក អគ្គនាយករងកីឡា បានសម្ដែងនូវការកោតសរសើរ ចំពោះមន្រ្តីជំនាញ លោកគ្រូឧទ្ទេស និង សិក្ខាកាមទាំងអស់ដែលបានមើលឃើញពីគុណតម្លៃ នៃការប្រើប្រាស់បច្ចេកវិទ្យា ព័ត៌មានវិទ្យានាសម័យទំនើបក្នុងប្រតិបត្តិការការងារ និងបានរៀបចំខ្លួនចូលរួមសិក្សាវគ្គនេះប្រកបដោយការយកចិត្តទុកដាក់ខ្ពស់ ដើម្បីជាមូលដ្ឋានបំណិនឌីជីថលបន្ថែមសម្រាប់មន្រ្តីតាមអង្គភាពទាំងអស់ចំណុះអគ្គនាយកដ្ឋានកីឡា ក៏ដូចមន្រ្តីទីភ្នាក់ងារប្រឆាំងការប្រើប្រាស់សារធាតុដូប៉ាកម្ពុជា៕