វិសាខា ក្លិបបាល់ទាត់អាជីពអភិវឌ្ឍន៍យុវជននៅកម្ពុជា
ភ្នំពេញ: ក្លិបបាល់ទាត់វិសាខា (Visakha FC) គឺជាក្លិបបាល់ទាត់អាជីពមួយក្នុងចំណោម ១១ ក្លិបល្បីៗនៅកម្ពុជា ដែលមានការអភិវឌ្ឍន៍យ៉ាងឆាប់រហ័ស។ ក្លិបនេះកំពុងផ្តោតលើការអភិវឌ្ឍន៍កីឡាករបាល់ទាត់វ័យក្មេងគ្រប់កម្រិត ដោយមានការរៀបចំហ្វឹកហាត់ និងផ្តល់សិក្សាការអប់រំដល់កីឡាករយុវជន។
ក្លិបវិសាខាមានទីតាំងនៅសង្កាត់ឃ្មួញ ខណ្ឌសែនសុខ រាជធានីភ្នំពេញ។ ក្នុងឆ្នាំ ២០១៨ ក្លិបនេះបានឡើងលេងលីគកំពូលកម្ពុជា (MCL) ជាលើកដំបូង ហើយបានសាងសង់កីឡាដ្ឋានផ្ទាល់ខ្លួនឈ្មោះ Prince Stadium ដែលអាចផ្ទុកអ្នកទស្សនាបាន ៧,000 នាក់ ក្នុងដំណាក់កាលដំបូង។ គម្រោងនាពេលអនាគតនឹងពង្រីកទំហំដល់ ១០,000 កៅអី។ ការវិនិយោគនេះបានធ្វើឲ្យវិសាខាក្លាយជាក្លិបបាល់ទាត់ដែលមានស្តង់ដារប្រកបដោយវិជ្ជាជីវៈនៅកម្ពុជា។
ក្លិបវិសាខាបានបង្កើតក្រុមបាល់ទាត់យុវជនជាច្រើនថ្នាល រួមមាន៖
- ក្រុមអាយុក្រោម ១៥ ឆ្នាំ
- ក្រុមអាយុក្រោម ១៦ ឆ្នាំ
- ក្រុមអាយុក្រោម ១៨ ឆ្នាំ
កីឡាករវ័យក្មេងទាំងនេះត្រូវបានផ្តល់ឱកាសអប់រំទាំងផ្លូវកាយ និងផ្លូវចិត្ត ដោយមានការរស់នៅ និងហ្វឹកហាត់នៅក្នុងបរិយាកាសសម្បូរបែប។ ក្រោយពេលហ្វឹកហាត់ ពួកគេអាចបន្តការសិក្សារបស់ខ្លួននៅសាលារដ្ឋ។ ក្លិបវិសាខា ចង់ឲ្យកីឡាករខ្លួនមានការអភិវឌ្ឍគ្រប់វិស័យ ដើម្បីបង្កើតជាថ្នាលកីឡាករដែលអាចចូលរួមជាកម្លាំងសំខាន់សម្រាប់ក្រុមជម្រើសជាតិនាពេលអនាគត។
ការវិនិយោគរបស់វិសាខា FC ក្នុងការអភិវឌ្ឍកីឡាករយុវជន និងការសាងសង់កីឡាដ្ឋានផ្ទាល់ខ្លួន បានធ្វើឲ្យក្លិបនេះក្លាយជាក្លិបបាល់ទាត់អាជីពដែលមានសក្តានុពលនៅកម្ពុជា។ អនាគតក្លិបវិសាខាគឺសង្ឃឹមសម្រាប់ការរីកចម្រើនរបស់បាល់ទាត់កម្ពុជាដោយសារតែការផ្តោតលើការអភិវឌ្ឍន៍យុវជន។
