វគ្គបំប៉នស្តីពី “ការរៀបចំនិងគ្រប់គ្រងព្រឹត្តិការណ៍កីឡា” ចាប់ផ្តើមជាផ្លូវការហើយ

ភ្នំពេញ៖ វគ្គបំប៉នស្តីពី “ការរៀបចំនិងគ្រប់គ្រងព្រឹត្តិការណ៍កីឡា” បានចាប់ផ្តើមជាផ្លូវការនៅថ្ងៃទី ១ ខែមេសា ឆ្នាំ ២០២៥ នៅសាលប្រជុំមជ្ឈមណ្ឌលជាតិហ្វឹកហ្វឺនកីឡា។ ពិធីបើកវគ្គនេះ មានវត្តមានលោក វ៉ាត់ ចំរើន រដ្ឋលេខាធិការ ក្រសួងអប់រំ យុវជន និងកីឡា លោក ប៊ូ ជុំសេរី អនុរដ្ឋលេខាធិការ និងលោក ហួត សេងទ្រី ប្រធាននាយកដ្ឋានរៀបចំព្រឹត្តិការណ៍ និងស្ថិតិកីឡា។

លោក ហួត សេងទ្រី បានឲ្យដឹងថា វគ្គបំប៉ននេះមានគោលបំណងពង្រឹងសមត្ថភាពអ្នកចូលរួម ដោយផ្តល់ចំណេះដឹង ជំនាញ និងឧបករណ៍អនុវត្តជាក់ស្តែង ដើម្បីបង្កើនប្រសិទ្ធភាពក្នុងការរៀបចំ និងគ្រប់គ្រងព្រឹត្តិការណ៍កីឡា។ វគ្គនេះក៏អាចលើកកម្ពស់វិជ្ជាជីវៈ និងការងារជាក្រុម ដើម្បីធានាបាននូវស្តង់ដាតែមួយស្របតាមលក្ខណៈជាតិ និងអន្តរជាតិ។

វគ្គបំប៉ននេះមានការចូលរួមពីសិក្ខាកាមចំនួន ៨០ នាក់ មកពី ២៥ មន្ទីរអប់រំ យុវជន និងកីឡា និង ១៥ សហព័ន្ធកីឡាជាតិ ដូចជា អត្តពលកម្ម, ហែលទឹក, វាយសី, បាល់បោះ, បាល់ទាត់ចំបាប់, វាយកូនឃ្លីលើតុ, តេក្វាន់ដូ WT និង ITF, បាល់ទះ, ប៊ូល និងប៉េតង់, គុនល្បុក្កតោ, វ៉ូវីណាម, ការ៉ាតេ និងគុនដាវ។

ក្នុងឱកាសនេះ លោក វ៉ាត់ ចំរើន បានថ្លែងសរសើរ និងវាយតម្លៃខ្ពស់ចំពោះការប្រឹងប្រែងរបស់ក្រសួងក្នុងការរៀបចំវគ្គបំប៉នដ៏មានសារៈសំខាន់នេះ។ លោកបានលើកឡើងថា វគ្គបំប៉ននេះនឹងផ្តល់ឱកាសដល់មន្ត្រីកីឡា និងសហព័ន្ធកីឡាជាតិក្នុងការពង្រឹងសមត្ថភាព និងអភិវឌ្ឍការរៀបចំព្រឹត្តិការណ៍កីឡាឲ្យមានលក្ខណៈស្តង់ដាជាតិនិងអន្តរជាតិ។

លោកក៏បានលើកឡើងថា ក្រសួងអប់រំ យុវជន និងកីឡា បានផ្តល់ការគាំទ្រថវិកាទៅសហព័ន្ធកីឡាជាតិ ដើម្បីជំរុញការរៀបចំការប្រកួតកីឡាយុវជនអាស៊ី និងការអភិវឌ្ឍកីឡាឆ្ពោះទៅឆ្នាំ ២០២៨ និង ២០២៩។

ចុងក្រោយ លោកបានលើកទឹកចិត្តដល់សិក្ខាកាមឲ្យខិតខំប្រឹងប្រែងទទួលយកចំណេះដឹងថ្មីៗ ដើម្បីអាចអនុវត្តក្នុងការរៀបចំ និងគ្រប់គ្រងព្រឹត្តិការណ៍កីឡា ឲ្យមានប្រសិទ្ធភាព និងស្តង់ដាអន្តរជាតិ ស្របតាមស្លោក “រួមគ្នាគិត រួមគ្នាធ្វើ និងរួមគ្នាទទួលខុសត្រូវ”។