ថ្នាក់ដឹកនាំជាន់ខ្ពស់សហព័ន្ធកីឡាវាយសី រំលឹកដល់អត្តពលិក ចាញ់សូមកុំបាក់ទឹកចិត្តត្រូវលើកទឹកចិត្តខ្លួនឯងចាញ់ថ្ងៃនេះឈ្នះថ្ងៃមុខនឹងទទួលបានជ័យជំនះ
ឯកឧត្តម ឧត្តមសេនីយ៍ឯក លី កុសល ប្រធានសហព័ន្ធកីឡាវាយសីកម្ពុជា បាន ក្រើនរំលឹក លើកទឹកចិត្តដល់កីឡាករការិនីវាយសីដែលចាញ់ ក្នុងការប្រជែងជើងឯកថ្នាក់ជាតិឆ្នាំ ២០២០ ដែលបានបញ្ចប់ កាលពីល្ងាចថ្ងៃ ទី១៨ ខែ មករា ឆ្នាំ ២០២១ថា កីឡាករការិនីតាមបណ្តាក្លិបដែលមិនទទួលបានមេដាយសូមកុំអាក់អន់ចិត្តឬខកបំណងឲ្យសោះ ដ្បិតការប្រកួតវាតែងតែទទួលបានលទ្ធផលចាញ់ឬឈ្នះជារឿងធម្មាតា។ដូច្នោះហើយ ការទទួលបរាជ័យនៅពេលនេះ វាគឺជាបទពិសោធន៍ល្អមួយដែលយើងត្រូវរៀនសិក្សាសូត្រអំពីមូលហេតុដែលបណ្តាធ្វើឲ្យយើងទទួលបរាជ័យ ដើម្បីពង្រឹងអភិវឌ្ឍសមត្ថភាពឈានទៅដណ្តើមបានមេដាយនៅឆ្នាំក្រោយទៀតជូនក្លិប និងស្ថានប័នរបស់យើង។
ឯកឧត្តម ប្រធានសព័ន្ធ លើកឡើងទៀតថា ការបណ្តុះឆន្ទៈ មានការឈឺចាប់ចំពោះលទ្ធផលបរាជ័យ គឺជាគន្លឹះល្អមួយសម្រាប់កីឡាករការិនីគ្រប់រូប ដើម្បីជម្រុញបណ្តុះស្មារតីលើកទឹកចិត្តខ្លួនឯង ឲ្យខិតខំហ្វឹកហាត់បង្កើនសមត្ថភាពដណ្តើមជ័យជំនះ ស្តាកេរ្តិ៍ឈ្មោះជួយឲ្យខ្លួនល្បីល្បាញក្លាយជាកីឡាករការិនីតំណាងប្រទេសនៅពេលអនាគត។
ឯកឧត្តម ប្រធានសហព័ន្ធ ក៍បានផ្តាំផ្ញើរឲ្យកីឡាករការិនីវាយសីកម្ពុជា បង្កើតការខិតខំប្រឹងប្រែងហ្វឹកហាត់ ធ្វើយ៉ាងណាម្ចាស់ការលើខ្លួនឯង ទោះបី ចេញទៅប្រកួតក្រៅប្រទេសក្តី សូមពង្រឹងភាពក្លាហានកុំដាក់ចិត្តខ្លាចរអាកីឡាករការិនីក្រៅប្រទេសឲ្យសោះ ព្រោះថា ពួកគេជាកីឡាករការិនីដូចពួកយើងទាំងអស់គ្នា និងមានការហ្វឹកហាត់ដូច។ ដូច្នោះការប្រជែងនៅក្រៅប្រទេសត្រូវម៉ឺងមាត់និងតាំងចិត្តខ្ពស់ប្រកួតយកជ័យជំនះជូនជាតិ ទើបការប្រកួតយើងទទួលបានជោគជ័យ។ទន្ទឹមជាមួយគ្នានោះ ឯកឧត្តម បានជម្រុញលើកទឹកចិត្តឲ្យកីឡាករការិនីយកចិត្តទុកដាក់ហ្វឹកហាត់ឲ្យបានទៀងទាត់ជាប្រចាំ ដើម្បីអភិវឌ្ឍខ្លួនក្លាយជាកីឡាករការិនីមានសិទ្ធផលខ្ពស់ គ្រូបង្វឹក និងចៅក្រមអាជ្ញាកណ្តាល ដើម្បីមានលទ្ធភាព សមត្ថភាពគ្រប់គ្រាន់ធ្វើម្ចាស់ផ្ទះ ស្មើរមុខស្មើរមាត់លើឆាកអន្តរជាតិ។
សម្រាប់លទ្ធផល ការប្រកួត រយៈពេល៣ថ្ងៃ៣ ក្លិប កីឡាវាយសីក្រសួង មហាផ្ទៃ ដណ្តើមបានមេដាយមាស៣គ្រឿង និងមេដាយប្រាក់១គ្រឿង .ក្លិបកីឡាវាយសីក្រសួង សេដ្ឋកិច្ច និងហិរញ្ញវត្ថុ ទទួលមេដាយមាស១គ្រឿង មេដាយប្រាក់ ១គ្រឿង និងមេដាយសំរិទ្ធ១គ្រឿង ក្លិបកីឡាវាយសីសៀមរាបទទួលមេដាយមាស១គ្រឿង មេដាយប្រាក់១គ្រឿង និងមេដាយសំរិទ្ធ ១គ្រឿង និងក្លិបកីឡាវាយសី ការពារអាកាស កងទ័ពជើងគោក ទទួលមេដាយមាស១គ្រឿង និងមេដាយប្រាក់១គ្រឿង ។ ណែកក្លិបកីឡាវាយសី កំពង់ចាម ទទួលមេដាយមាស១គ្រឿង សម័្ពន្ធកីឡាវាយសី ខេត្តប៉ៃលិន និងសម័្ពន្ធកីឡាវាយសី ខេត្តកំពង់ឆ្នាំង មេដាយប្រាក់១គ្រឿង និងមេដាយសំរិទ្ធ១គ្រឿង និងសម័្ពន្ធកីឡាវាយសីខេត្តស្វាយរៀង និងក្លិបកីឡាវាយសីស្តាតអូឡាំពិក ទទួលបានមេដាយសំរិទ្ធ១គ្រឿង ៕
