ថ្វីដ្បិតវគ្គបណ្តុះបណ្តាលគ្រូកម្រិតមូលដ្ឋានកីឡាទោចក្រយានជាវគ្គដំបូងតែវាជាមូលដ្ឋានគ្រឹះសម្រាប់ឈានទៅវគ្គបន្តទៀត
ភ្នំពេញ៖សិក្ខាកាមដែលជាគ្រូបង្វឹកនិងមន្រ្តីបច្ចេកទេសសហព័ន្ធចំនួន៣០នាក់ មកពីបណ្តាខេត្ត និងរាជធានីភ្នំពេញ បានបញ្ចប់វគ្គបណ្តុះបណ្តាលគ្រូកម្រិតមូលដ្ឋានកីឡាទោចក្រយានដែលរៀបចំដោយសហព័ន្ធកីឡាទោចក្រយានកម្ពុជា នៅខេត្តសៀមរាប។
លោក នូ ចំរើន អគ្គលេខាធិការ សហព័ន្ធកីឡាទោចក្រយានកម្ពុជា បានឲ្យដឹងថា វគ្គវគ្គបណ្តុះបណ្តាលគ្រូកម្រិតមូលដ្ឋានកីឡាទោចក្រយានបានដំណើររយៈពេល៤ថ្ងៃនៅខេត្តសៀមរាបមានសិក្ខាកាមចូលរួមចំនួន៣០នាក់ មកពីសមាគមក្លិបកង់ចំនួន៥ មានដូជា ក្លិបកង់ខេត្តព្រះវិហារ ក្លិបកង់កងរាជអាវុហត្ថលើផ្ទៃប្រទេស ក្លិបកង់ខេត្តសៀមរាប ក្លិបកង់មកពីរាជធានីភ្នំពេញ ក្លិបកង់NOCC និងមន្រ្តីបច្ចេកទេសរបស់សហព័ន្ធកីឡាទោចក្រយាន។
អគ្គលេខាធិការ បានលើកឡើងថា វគ្គបណ្តុះនេះឡើងក្នុងគោលបំណង ដើម្បីអភិវឌ្ឍ ធនធានមន្រ្តីបច្ចេកទេសក្នុងការរៀបចំការប្រកួតឲ្យស្រប និងអនុឡោមតាមស្តង់ដា សម្ព័ន្ធកីឡាទោចក្រយានអន្តរជាតិ ពិសេស ដើម្បីត្រៀមធ្វើជាម្ចាស់ផ្ទះស៊ីហ្គេមលើកទី៣២ ឆ្នាំ២០២៣ផងដែរ។
ឯកឧត្តម ប៉ាន សូរស័ក្កិ ប្រធានសហព័ន្ធកីឡាទោចក្រយានកម្ពុជា បានកោតសសើរនិងវាយតម្លៃខ្ពស់ចំពោះការពុះពារចូលរួមពីគ្រូៗបណ្តាក្លិប និងមន្រ្តីបច្ចេកទេសរបស់សហព័ន្ធក្នុងការចូលរួមវគ្គបណ្តុះបណ្តាលគ្រូកម្រិតមូលដ្ឋានកីឡាទោចក្រយានដែលរៀបចំដោយសហព័ន្ធ។ឯកឧត្តម ប្រធានបាន សង្កត់ធ្ងន់ថា ថ្វីត្បិតវគ្គបណ្តុះបណ្តាលនេះ ជាវគ្គកម្រិតមូលដ្ឋានដំបូងក្តី ប៉ុន្តែវាជាមូលដ្ឋានមួយដ៍មានសារៈដែលជាមូលដ្ឋានគ្រិះជួយឲ្យយើងឈានទៅបន្តចាប់យកវគ្គកម្រិតខ្ពស់ជាងនេះទៀត ដើម្បីក្លាយមន្រ្តីបច្ចេកទេសៗជាធនធានបំរើរការងារនៅស៊ីហ្គេមឆ្នាំ ២០២៣ពេលដែលកម្ពុជាធ្វើជាម្ចាស់ផ្ទះ។
ឯកឧត្តម បានផ្តាំផ្ញើរដល់គ្រូៗនិងមន្រី្តបច្ចេកទេសសហព័ន្ធដែលបានចូលរួមវគ្គបណ្តុះបណ្តាលគ្រូកម្រិតមូលដ្ឋានកីឡាទោចក្រយានត្រូវយកចំណេះដឹងដែលទទួលបានពីវគ្គបណ្តុះបណ្តាលនេះទៅអនុវត្ត និងចែករំលែកដល់កីឡាករកីឡាការិនីតាមបណ្តាលក្លិបធ្វើយ៉ាងណាពួកគេទទួលបានពុទ្ធិបន្ត ឲ្យពួកគេមានមូលដ្ឋានគ្រឹះក្នុងការអភិវឌ្ឍសមត្ថភាពហ្វឹកហាត់ឲ្យត្រូវនិងបច្ចេកទេសស្តង់ដា ដើម្បីក្លាយជាកីឡាករកីឡាការិនីដែលមានសក្តានុពលសម្រាប់កម្ពុជា។
សូមបញ្ជាក់ថា វគ្គវគ្គបណ្តុះបណ្តាលគ្រូកម្រិតមូលដ្ឋានកីឡាទោចក្រយានបានដំណើរការរយៈពេល៤ថ្ងៃ ចាប់ពីថ្ងៃទី១៩ដល់ថ្ងៃ ទី២២ ខែ មករា ឆ្នាំ២០២១ ដោយមានសិក្ខាកាមចូលរួមចំនួន៣០នាក់ ក្នុងនោះ និន្ទេសល្អ ៤០% និន្ទេសល្អបង្គួរ៥០% និងមធ្យម១០%៕