លោក ប៊ុយ សុភ័ណ្ឌ ៖ សិក្ខាកាមទាំងអស់ បានបង្ហាញស្មារតីចូលរួមសិក្សាយ៉ាងផុលផុស ស្វែងយល់ពីបទបញ្ជាបច្ចេកទេសហ្វឹកហាត់ ការរៀបចំកម្មវិធីហ្វឹកហាត់ស្របតាមស្តង់ដារអន្តរជាតិ

វគ្គបណ្ដុះបណ្ដាលគ្រូបង្វឹកកម្រិតថ្នាក់ជាតិកីឡាប្រដាល់សកល បានបញ្ចប់នៅល្ងាចថ្ងៃទី០២ ខែកុម្ភៈ ឆ្នាំ២០២២ បន្ទាប់ពីដំណើរការអស់រយ:ពេល៣ថ្ងៃ នៅទីស្នាក់ការគណៈកម្មាធិការជាតិអូឡាំពិកកម្ពុជា ក្រោមជំនួយថវិកាគាំទ្ររបស់ក្រសួងអប់រំ យុវជន និងកីឡា ។

លោក ប៊ុយ សុភ័ណ្ឌ អគ្គលេខាធិការសហព័ន្ធកីឡាប្រដាល់សកលកម្ពុជា ទទួលបន្ទុកប្រធានគ្រប់គ្រងវគ្គនេះ គូសបញ្ជាក់ថា វគ្គនេះមានសិក្ខាកាមចូលរួមសរុប ២០នាក់ ដែលជាគ្រូបង្វឹកនៅតាមបណ្តាក្លិបកីឡាប្រដាល់សកលនៅរាជធានីភ្នំពេញ ខេត្តកំពង់ឆ្នាំង ព្រៃវែង កំពង់ស្ពឺ ព្រះសីហនុ កំពត និងសៀមរាប។

គ្រូឧទ្ទេសគឺ លោក RUSSELL STUTELY គ្រូបង្វឹកប្រដាល់សកលអន្តរជាតិ បង្រៀនលើផ្នែកបច្ចេកទេសសំខាន់ៗនៃការបង្វឹក បទបញ្ជាបច្ចេកទេសហ្វឹកហាត់កីឡាប្រដាល់សកល និងតួនាទីរបស់គ្រូបង្វឹក។ ចំពោះលទ្ធផលនៃវគ្គបណ្តុះបណ្តាលនេះ គឺគ្រូបង្វឹកចំនួន៧នាក់ ទទួលបាននិទ្ទេសល្អ និង១៣នាក់ ល្អបង្គួរ។ ប្រធានគ្រប់គ្រងវគ្គបណ្តុះបណ្តាលរូបនេះបន្ថែមថា តាមការសន្និដ្ឋានជារួម សិក្ខាកាមទាំងអស់ បានបង្ហាញស្មារតីចូលរួមសិក្សាយ៉ាងផុលផុស និងបានស្វែងយល់ពីបទបញ្ជាបច្ចេកទេសហ្វឹកហាត់កីឡាប្រដាល់សកល ការរៀបចំកម្មវិធីហ្វឹកហាត់ស្របតាមស្តង់ដារអន្តរជាតិ និងការអនុវត្តផ្ទាល់ស្តីពីវិធីសាស្ត្របង្វឹក។

លោកប៊ុយ សុភ័ណ្ឌ បានចាត់ទុកថា វគ្គបណ្តុះបណ្តាលគ្រូបង្វឹកថ្នាក់ជាតិនេះ ពិតជាមានសារៈសំខាន់ណាស់ ដែលគ្រូបង្វឹកប្រដាល់សកលកម្ពុជា ទទួលបានចំណេះដឹងថ្មីៗបន្ថែម ពីគ្រូឧទ្ទេសប្រចាំវគ្គ គឺលោក RUSSELL STUTELY ដែលជាគ្រូកម្រិតអន្តរជាតិ ។ លោក អគ្កលេខាធិការ បានដាក់ក្តីរំពឹងខ្ពស់ថា តាមរយៈសមិទ្ធផលថ្មីនេះ គ្រូបង្វឹកទាំងអស់នឹងយកចំណេះដឹងទាំងនេះ ទៅបង្ហាត់បង្រៀនដល់កីឡាករ កីឡាការិនីប្រដាល់សកលកម្ពុជា ឲ្យមានគុណភាពកាន់តែខ្ពស់ ដើម្បីត្រៀមលក្ខណៈឲ្យកាន់តែរឹងមាំ ត្រៀមឆ្ពោះទៅទទួលធ្វើម្ចាស់ផ្ទះ ការប្រកួតកីឡា ស៊ីហ្គេម ឆ្នាំ២០២៣ ។

លោក ទុយ ប៊ុនហឿន អនុប្រធាននាយកដ្ឋានអប់រំកាយ និងកីឡា នៃក្រសួងអប់រំ យុវជន និងកីឡា បានបង្ហាញការកោតសរសើរ និងវាយតម្លៃខ្ពស់ចំពោះថ្នាក់ដឹកនាំសហព័ន្ធ និងសិក្ខាកាមជាគ្រូបង្វឹកទាំងអស់ ដែលខិតខំពង្រឹងគុណភាព និងបន្តការអភិវឌ្ឍវិស័យកីឡាប្រដាល់សកល ឲ្យកាន់តែរីកចម្រើនបន្ថែម ជាពិសេសសម្រួចគោលដៅឆ្ពោះទៅទទួលរៀបចំការប្រកួតកីឡា ស៊ីហ្គេម លើកទី៣២ ឆ្នាំ២០២៣ ជាប្រវត្តិសាស្ត្រដំបូងរបស់កម្ពុជា។

ជាមួយគ្នានោះ ក្នុងនាមនាយកដ្ឋានអប់រំកាយ និងកីឡា លោក បានស្នើឲ្យគ្រូបង្វឹកទាំងអស់ ក៏ដូចជាថ្នាក់ដឹកនាំសហព័ន្ធកីឡាប្រដាល់សកល គប្បីប្រឹងប្រែងសម្រួចបច្ចេកទេសរបស់កីឡាករ កីឡាការិនី និងមន្ត្រីបច្ចេកទេស ដើម្បីត្រៀមទទួលធ្វើម្ចាស់ផ្ទះ ស៊ីហ្គេម ឆ្នាំ២០២៣ ឲ្យទទួលបានជោគជ័យ តាមរយៈការប្រជែងមេដាយជូនជាតិ និងការរៀបចំឲ្យទទួលបានកិត្តិយសជាតិ ដែលជារឿងសំខាន់បំផុត តាមអនុសាសន៍របស់ថ្នាក់ដឹកនាំ។