សហព័ន្ធកីឡារាំ បានត្រៀម១៤វិញ្ញាសា សម្រាប់ស៊ីហ្គេម នៅកម្ពុជា

ភ្នំពេញ៖ លោកស្រី ហង្ស ស៊ីម៉ន អគ្គលេខាធិការសហព័ន្ធកីឡារាំកម្ពុជា បានអោយដឹងថា ក្រោយបញ្ចប់បេសកម្មស៊ីហ្គេម នៅវៀតណាម កីឡាករ កីឡាការិនីមានសិទ្ធផល និងគុណផលកើនឡើងខ្លាំងគួរអោយកត់សំគាល់ បើធៀបនឹងស៊ីហ្គេម នៅហ្វីលីពីន ឆ្នាំ២០១៩កន្លងទៅ។

លោកស្រី ហង្ស ស៊ីម៉ន បន្តថា សហព័ន្ធកីឡារាំកម្ពុជា បានត្រៀមដាក់១៤វិញ្ញាសា សម្រាប់ស៊ីហ្គេម ឆ្នាំ២០២៣ សិតសឹង​ជា​វិញ្ញា​សាសក្តានុពល សម្រាប់ត្រៀមដណ្តើមមេដាយ មានចង្វាក់ Latin Dance , Standard Dance ១២វិញ្ញាសា និង Break Dance ២វិញ្ញាសា ។ លោកស្រី បន្ថែមថា ការដាក់ក្តីរំពឹងបែបនេះ ដោយសារសហព័ន្ធមានផែនការច្បាស់លាស់ ដោយវិញ្ញាសានីមួយៗ គឺតម្រូវអោយកីឡាករ កីឡាការិនី Latin Dance ហ្វឹកហាត់តែវិញ្ញាសា Latin Dance រីឯ Standard Dance ហ្វឹកហាត់តែ Standard Dance និង Break Dance ហ្វឹកហាត់តែ Break Dance តែប៉ុណ្ណោះ ដើម្បីអោយពួកគាត់ត្រៀមលក្ខណអោយបានល្អ និងគ្រប់ជ្រុងជ្រោយ ។

មួយវិញទៀត សហព័ន្ធគ្រោងនឹងបញ្ជូនទៅហ្វឹកហាត់នៅប្រទេសចិន ក្នុងអំឡុងខែសីហា ឬខែកញ្ញាខាងមុខនេះ តាមរយៈសហព័ន្ធកីឡារាំអាស៊ី ទំនុកបំរុងទាំងការស្នាក់នៅ ហូបចុក រយៈពេល២ខែ ។ បន្ទាប់ពីបញ្ចប់ការហ្វឹកហាត់នៅចិន សហព័ន្ធមានគម្រោងនឹងស្នើសុំគ្រូកម្រិតខ្ពស់ មកបង្វឹកក្រុមជម្រើសរើសជាតិបន្តទៀត ។លោកស្រីអគ្គលេខាធិការ បញ្ជាក់ថា ការហ្វឹកហាត់ក្រៅប្រទេស និងមានគ្រូកម្រិតខ្ពស់មកបង្វឹក បូករួមទាំងមានការប្រកួតច្រើនទាំងកម្រិតជាតិ និងអន្តរជាតិ សហព័ន្ធមានក្តីរំពឹងខ្ពស់ថា នឹងទទួលបានមេដាយ លើចង្វាក់ Latin Dance វិញ្ញាសា Jive , Paso Dable , Cha Cha និង Samba ឯ ចង្វាក់ Standard Dance វិញ មានវិញ្ញាសា Slow foxtrot ដោយការប្រកួតស៊ីហ្គេម នៅវៀតណាម ទទួលបានចំណាត់លេខ៤ និង Quick step ចំនែក Break Dance ក៏សង្ឃឹមខ្ពស់ដោយសារជាវិញ្ញាសាអូឡាំពិក ហើយកម្ពុជាក្លឹបច្រើន និងធនធានច្រើន ។

លោកស្រី ហង្ស ស៊ីម៉ន បន្ថែមថា ក្រៅពីផ្តោតលើអត្តពលិក សហព័ន្ធក៏គិតគូរពីចៅក្រម អាជ្ញាកណ្តាល និងមន្រ្តីបច្ចេកទេស ដើម្បីត្រៀមស៊ីហ្គេម ដូចជា បើកវគ្គបណ្តុះបណ្តាលចៅក្រមកម្រិតមូលដ្ឋាន ដើម្បីត្រៀមរៀបចំការប្រកួតជើងឯកថ្នាក់ជាតិ នាខែតុលាខាងមុខ និងការចូលរួមប្រកួតកម្រិតអន្តរជាតិផងដែរ ។គួរបញ្ជាក់ថា សហព័ន្ធកីឡារាំកម្ពុជា បានត្រៀមអត្តពលិក១០រូប កីឡាករ៥ កីឡាការិនិ៥ លើ១៤វិញ្ញាសា ក្នុងព្រឹត្តការណ៍ស៊ីហ្គេម លើកទី៣២ នាឆ្នាំ២០២៣ ដែលកម្ពុជាធ្វើជាម្ចាស់ផ្ទះ ហើយបើតាមសន្ទសន៍ Camsoc ដាក់ជូនសហព័ន្ធកីឡារាំ ត្រូវដណ្តើមអោយបានមេដាយមាស១គ្រឿង ជូនកម្ពុជា ៕

រូបភាព Cambodia 2023

ដោយ ៖ គោព្រៃ