ពិធីបិទការប្រកួតកីឡាអត្តពលកម្ម ក្នុងព្រឹត្តិការណ៍ប្រកួតកីឡាឧត្តមសិក្សា និងមធ្យមសិក្សាបច្ចេកទេសថ្នាក់ជាតិ ឆ្នាំ២០២៤ នៅទីលានបាល់ទាត់ ក្នុងពហុកីឡដ្ឋានជាតិ

រាជធានីភ្នំពេញ៖ រសៀលថ្ងៃ២៥ ខែឧសភា ឆ្នាំ២០២៤ សហព័ន្ធខ្មែរអត្តពលកម្ម ស្ម័គ្រចិត្ត បានប្រារព្វពិធីបិទបញ្ចប់ការប្រកួតកីឡាអត្តពលកម្មរបស់ខ្លួន ក្នុងព្រឹត្តិការណ៍ប្រកួតកីឡាឧត្តមសិក្សា និងមធ្យមសិក្សាបច្ចេកទេសថ្នាក់ជាតិ ឆ្នាំ២០២៤ នៅសាលសហព័ន្ធកីឡវាយសី នៅទីលានបាល់ទាត់ ក្នុងពហុកីឡដ្ឋានជាតិ ដែលបានដំណើរការប្រកួតអស់រយៈពេល៣ថ្ងៃ ចាប់ពីថ្ងៃទី២៣ ដល់ថ្ងៃទី២៥ ខែឧសភា ឆ្នាំ២០២៤ ។

លោក ដួង មាសចំរើន អគ្គនាយករងកីឡា និងជាប្រធានសហព័ន្ធខ្មែរអត្តពលកម្មស្ម័គ្រចិត្តបានមានប្រសាសន៍ថា លទ្ធផលថ្ងៃនេះគឺជាការឆ្លុះបញ្ចាំងឱ្យឃើញពីការវិវឌ្ឍន៍វិស័យកីឡា ដោយឡែកវិស័យកីឡាអត្តពលកម្មពិនិត្យឃើញមានការរីកដុះដាលគួរជាទីមោទនៈ។ ក្នុងនាមគណៈកម្មការប្រតិបត្តិ និងក្នុងឋានៈជាប្រធានសហព័ន្ធក៏សូមអបអរសាទរទៅដល់ជ័យលាភីរបស់កីឡាករ កីឡាការិនី ទាំងអស់ដែលទទួលបាននូវចំណាត់ថ្នាក់ដ៏ត្រចះត្រចង់នេះ ពិតជាការឆ្លុះបញ្ចាំងទៅដល់ការខិតខំប្រឹងប្រែងរបស់កីឡាករ កីឡការិនី ក៏ដូចជាគ្រឹះស្ថានឧត្តមសិក្សា និងមធ្យមសិក្សាបច្ចេកទេសទាំងអស់ដែលបានយកចិត្តទុកដាក់លើការហ្វឹកហាត់ ក៏ដូចជាលោកគ្រូ អ្នកគ្រូប្រចាំនៅតាមសាលានីមួយៗ ដែលធ្វើឱ្យលទ្ធផល និងបច្ចេកទេសរបស់យើងមានការរីកចម្រើនច្រើនទៅលើគុណផលកីឡាគួរជាទីគាប់ប្រសើរ។

លោកប្រធានក៏បានផ្ដាំផ្ញើផងដែរថា សូមដល់កីឡាករ កីឡាការិនីរបស់យើងដែលបានទទួលចំណាត់ថ្នាក់នាពេលនេះ ពិតមែនតែលទ្ធផលទទួលបានបែបនេះក្ដី ប៉ុន្ដែតាមលក្ខណៈបច្ចេកទេសរបស់យើង ក៏នៅតែសំណូមពរបន្ថែម ដែលចាប់ពីការទទួលបានលទ្ធផលនេះទៅសូមកុំបោះបង់ចោល ត្រូវតែខិតខំប្រឹងប្រែងហ្វឹកហាត់បន្ដទៀត ដើម្បីចូលរួមប្រកួតក្នុងកម្មវិធីផ្សេងៗ រួមនឹងកម្មវិធីរបស់ក្រសួងអប់រំ យុវជន និងកីឡា ហើយសូមកីឡាករ កីឡាការិនីដែលពុំទាន់ទទួលបានចំណាត់ថ្នាក់នោះ សូមឱ្យមានការប្រឹងប្រែងហ្វឹកហាត់បន្ដទៀត ដើម្បីជាលទ្ធផលសម្រាប់ថ្ងៃអនាគតរបស់ខ្លួនឯង។ក្នុងនោះដែរទៅតាមប្រធានបទដែលបានរៀបចំការប្រកួតក្នុងឆ្នាំនេះគឺ កីឡាឌីជីថល ជាអនាគតយុវជនទាំងអស់គ្នា ប្រធានបទនេះផងដែរជាមោទនភាពនៃការចង្អុលបង្ហាញសម្រាប់ដល់យុវជនរបស់យើង ក៏ដូចជាកីឡាករ កីឡាការិនីទាំងឡាយថែមទៀតផង។

យោងតាមរបាយការណ៍ សម្រាប់ប្រភេទកីឡាអត្តពលកម្ម គ្រឹះស្ថានឧត្តមសិក្សា និងមធ្យមសិក្សាបច្ចេកទេសចំនួន ១២ចូលរួមមាន
សាកលវិទ្យាល័យអាស៊ីអឺរ៉ុប សាកលវិទ្យាល័យកម្ពុជា វិទ្យាស្ថានខេមអេដ វិទ្យាស្ថានជាតិអប់រំកាយ និងកីឡា វិទ្យាស្ថានបច្ចេកវិទ្យាកំពង់ឈើទាល សាកលវិទ្យាល័យជាតិគ្រប់គ្រង វិទ្យាស្ថានបច្ចេកវិទ្យាកម្ពុជា សាកលវិទ្យាល័យជាតិមានជ័យ សាគលវិទ្យាល័យ ហេង សំរិន ខេត្តត្បូងឃ្មុំ សាកលវិទ្យាល័យ ជា ស៊ីម កំចាយមារ សាកលវិទ្យាល័យស្វាយរៀង និងសាកលវិទ្យាល័យក្រចេះ។ ក្រោយការប្រកួតយ៉ាងស្វិតស្វាញ ជ័យលាភីបានទៅលើ សាកលវិទ្យាល័យអាស៊ីអឺរ៉ុបមេដាយមាស១៦ ប្រាក់ ១០ សំរឹទ្ធិ ១ សាកលវិទ្យាល័យកម្ពុជា មេដាយមាស ៣ ប្រាក់ ៤ សំរឹទ្ធិ ៨ វិទ្យាស្ថានខេមអេដមេដាយមាស ៣ ប្រាក់ ១ សំរឹទ្ធិ ២ វិទ្យាស្ថានជាតិអប់រំកាយ និងកីឡាមេដាយមាស ១ ប្រាក់ ៨ សំរឹទ្ធិ ៩វិទ្យាស្ថានបច្ចេកវិទ្យាកំពង់ឈើទាលមេដាយមាស ១ ប្រាក់ ១ សំរឹទ្ធិ ២ សាកលវិទ្យាល័យជាតិគ្រប់គ្រង មេដាយមាសសំរឹទ្ធិ ១ វិទ្យាស្ថានបច្ចេកវិទ្យាកម្ពុជាមេដាយសំរឹទ្ធិ ១៕