ក្រុមទូកនាគកម្ពុជា ជាប់ចំណាត់ថ្នាក់លេខ៦ ពីព្រឹត្តិការណ៍ប្រកួតកីឡាទូកនាគអន្តរជាតិ 2024 SJM Macao International Dragon Boat Races នៅចិនម៉ាកាវ
ក្រុមទូកនាគកម្ពុជា ជាប់ចំណាត់ថ្នាក់លេខ៦ ពីព្រឹត្តិការណ៍ប្រកួតកីឡាទូកនាគអន្តរជាតិ 2024 SJM Macao International Dragon Boat Races នៅចិនម៉ាកាវ ។
លោក គង់ សុភាព គ្រូជំនួយក្រុមជម្រើសជាតិទូកកម្ពុជា បានគូសបញ្ជាក់ប្រាប់តាមប្រព័ន្ធតេក្រាមថា ការប្រកួតទូកនាគអន្តរជាតិ ដែលរៀបចំនៅទីក្រុង ម៉ាកាវ ប្រទេសចិន ពីថ្ងៃទី១០ដល់១១ ខែ មិថុនា ឆ្នាំ២០២៤ បានបញ្ចប់ហើយ ។ សម្រាប់ ក្រុមទូកនាគកម្ពុជា គឺបានឡើងដល់វគ្គផ្តាច់ព្រ័ត្រដណ្តើមមេដាយ ប៉ុន្តែកម្ពុជាពុំបាន ឈ្នះ មេដាយឡើយ ដោយកម្ពុជាទទួលបានចំណាត់ថ្នាក់លេខ៦ក្នុងចំណោម ៦ប្រទេសដែលជាជើងខ្លាំង ។
គ្រូជំនួយខាងលើ បានបន្តទៀតថា សម្រាប់លទ្ធផលដែលទទួលបាននេះ បើទោះបីក្រុមទូករបស់កម្ពុជាមិនទទួលបានមេដាយជូនជាតិដូចការរំពឹងទុកយ៉ាងណាក្តី លទ្ធផលចំណាត់ថ្នាក់លេខ៦នេះ ក៏អាចនិយាយបានថា ជាលទ្ធផលល្អមួយដែររបស់កម្ពុជា សម្រាប់ព្រឹត្តិការណ៍ប្រកួតទូកនាគកម្រិតអន្តរជាតិមួយនេះ ព្រោះក្រុមកម្ពុជាបានប្រឹងប្រែងប្រកួតអស់ពីលទ្ធភាព ដោយឆ្លងកាត់កាត់ប្រកួតវគ្គជម្រុះរហូតឈានដល់វគ្គផ្តាច់ព្រ័ត្រដណ្តើមមេដាយ ខណៈដែលការប្រកួតក្រុមប្រទេសចូលរួមភាគច្រើនជាក្រុមខ្លាំងៗជាម្ចាស់មេដាយក្នុងព្រឹត្តិការណ៍ប្រកួតអេស៊ានហ្គេម(ASIAN Games)កន្លងមក។
លោកថា តាមរយៈលទ្ធផលនេះ ក្រុមកីឡាទូកកម្ពុជានឹងបន្តការខិតខំដុះខាតសមត្ថភាពបន្ថែមទៀត ដើម្បីសម្រួចការអភិវឌ្ឍត្រៀមឆ្ពោះទៅចូលរួមការប្រកួត អន្តរជាតិនានា នាពេលខាងមុខ ជាពិសេសគោលដៅត្រៀមស៊ីហ្គេម លើកទី៣៣ នៅប្រទេសថៃ នាឆ្នាំ២០២៥ខាងមុខ។ លោក គង់ សុភាព គ្រូជំនួយ បានបន្ថែមទៀតថា លទ្ធផលចំណាត់លេខ៦ ដែលក្រុមកម្ពុជាទទួលបាននេះ ជាការវាយតម្លៃរបស់លោក Naing Naing Htoo គ្រូបង្វឹកធំគឺជាលទ្ធផលវិជ្ជមានមួយបង្ហាញថា ក្រុមកម្ពុជាកំពុងវិឌ្ឍសមត្ថភាពរីកចម្រើនដែលអាចមានឱ្យទទួលបានមេដាយក្នុងការប្រកួតស៊ីហ្គេម នៅប្រទេសថៃ ឆ្នាំ២០២៥ ។
ព្រឹត្តិការណ៍កីឡាទូកអន្តរជាតិនេះ មានក្រុមចូលរួម ចំនួន៣២ក្រុម លើវិញ្ញាសា ៥០០ម៉ែត្រ ចំណុះ២២នាក់ ។ ចំពោះក្រុមដែលទទួលបានចំណាត់ថ្នាក់មេដាយ រួមមាន៖ លេខ១ មេដាយមាស ក្រុមកីឡាទូកនាគប្រទេសចិន, លេខ ២ មេដាយប្រាក់ ក្រុមកីឡាទូកនាគប្រទេសថៃ, លេខ ៣ មេដាយសំរឹទ្ធ ក្រុមកីឡាទូកនាគចិនម៉ាកាវ ៕