គ្រូជម្រើសជាតិតេក្វាន់ដូ WT ពន្យល់ពីផលវិជ្ជមានសម្រាប់ការប្រកួត 2024 Korean Ambassador’s Cup Taekwondo Competition
លោក ឆយ យ៉ុងសុក គ្រូបង្វឹកតេក្វាន់ដូ WT ជម្រើសជាតិកម្ពុជាពន្យល់ពីផលវិជ្ជមានក្នុងការរៀបចំការប្រកួត 2024 Korean Ambassador’s Cup Taekwondo Competition ដែលបានបិទបញ្ចប់កាលពីល្ងាចថ្ងៃទី១៣ ខែមិថុនា ឆ្នាំ២០២៤ នៅពហុកីឡដ្ឋានជាតិ។
ក្នុងបទសម្ភាសន៍ជាមួយអ្នកសារព័ត៌មានលោកគ្រូបង្វឹកជនជាតិកូរ៉េខាងត្បូងរូបនេះបានឲ្យដឹងថា «វាជាផលល្អមួយសម្រាប់ការបណ្ដុះបណ្ដាលយុវជនរបស់យើង ពិសេសបង្កើនស្មារតីស្រលាញ់កីឡាតេក្វាន់ដូ WT ដល់កុមារតូចៗឲ្យបានកាន់តែច្រើន។ តាមការកត់សម្គាល់លោកមើលយើងឃើញថា ឆ្នាំនេះសន្ទុះនៃការចូលរួមរបស់ក្មេងៗតូចមានច្រើន ដែលវាជាផលវិជ្ជមានមួយក្នុងការត្រៀមខ្លួនឲ្យបានកាន់តែល្អសម្រាប់ឆ្នាំ២០២៩ ដែលកម្ពុជានឹងធ្វើជាម្ចាស់ផ្ទះកីឡាយុវជនជើងឯកអាស៊ី»។
លោកបានពន្យល់បន្ថែមទៀតថា «ឆ្នាំនេះកីឡាករ-កីឡាការិនីយើងមានការចូលរួមច្រើនទាំងក្មេង និងយុវជន ហើយក្មេងៗយើងឆ្នាំនេះមានការចូលរួមច្រើន ទាំងនេះដោយសារតែផែនការយើងគឺព្យាយាមពង្រឹងក្មេងៗឲ្យបានច្រើន ព្រោះអីយើងមានការប្រកួតច្រើនមុនពេលការប្រកួតជ្រើសរើសជើងឯកយុវជនអាស៊ីដែលកម្ពុជាធ្វើម្ចាស់ផ្ទះចាប់ផ្ដើម យើងមើលឃើញថាមានការប្រកួតច្រើនគឺស៊ីហ្គេម២ដង និងការប្រកួតជ្រើសរើសជើងឯកអាស៊ីអាគ្នេយ៍មានច្រើនដងទៀត។ យើងមើលឃើញថាឆ្នាំនេះសន្ទុះនៃការចូលរួមមានការកើនឡើងរហូតដល់ជិត៣០០នាក់ដែលដែលវាជាសញ្ញាមួយល្អមែនទែន ខណៈដែលឆ្នាំកន្លងយើងមានត្រឹមតែជាង១០០នាក់ទេ»។
សូមបញ្ជាក់ថា ការប្រកួត 2024 Korean Ambassador’s Cup Taekwondo Competition គឺមានប្រតិភគ្រូបង្វឹក៣៤នាក់កីឡាករ១៤០ និងកីឡាការិនី ១២២ ដោយក្នុងនោះមកពីតាមបណ្ដាក្លិប និងសាលា គ្រឹះស្ថានសិក្សាសរុបចំនួន ២២ ដោយធ្វើការប្រកួតចំនួន១ថ្ងៃពេញគឺនៅថ្ងៃទី១៣ ខែឧសភា ឆ្នាំ២០២៤ នៅអាគារប៊ូយុងរបស់ខេមរៈសហព័ន្ធតេក្វាន់ដូ WT ៕