ក្រុមសុវណ្ណភូមិ គ្រងជើងឯក កីឡាបាល់ទាត់មហាជនរាជធានីភ្នំពេញ ឆ្នាំ២០២៤

ភ្នំពេញ ៖ ក្រុមយុវជនសុវណ្ណភូមិ បានគ្រងតំណែងជើងឯក កីឡាបាល់ទាត់មហាជន រាជធានីភ្នំពេញ ប្រចាំរដូវកាល ឆ្នាំ២០២៤ បន្ទាប់ពីបានយកឈ្នះលើក្រុម CBS នៅវគ្គផ្តាច់ព្រ័ត្រ យ៉ាងស្វិតស្វាញ ដោយលទ្ធផលទាត់បាល់កាត់សេចក្តី១១ម៉ែត្រ ៣-១ ក្រោយបញ្ចប់ពេញម៉ោង នៃការប្រកួតលទ្ធផលស្មើគ្នា ៤-៤ ខណៈចំណាត់ថ្នាក់លេខ៣ បានទៅលើក្រុមវិទ្យាល័យព្រះស៊ីសុវត្ថិ។

ថ្លែងក្នុងឱកាសបិទការប្រកួតកីឡាមហាជន ជើងឯករាជធានីភ្នំពេញ ថ្ងៃទី២៦ ខែមិថុនា ឆ្នាំ ២០២៤ លោក អ៊ុក ចន្ថា អនុប្រធានមន្ទីរអប់រំ យុវជន និងកីឡារាជធានីភ្នំពេញបានកោតសរសើរ និងវាយតម្លៃខ្ពស់ចំពោះប្រតិភូដឹកនាំក្រុមកីឡា ដែលបានខិតខំបង្កើតក្រុមចូលរួមប្រកួតជើងឯកនាពេលនេះ ដែលជាកាយវិការ និងការចូលរួមដោយស្មោះក្នុងការកសាង និងអភិវឌ្ឍវិស័យកីឡានៅរាជធានីភ្នំពេញ និងជំរុញដល់យុវជនមហាជនឱ្យចូលរួមហាត់ និងលេងកីឡាទៅតាមប្រភេទ ដែលពួកគេចូលចិត្ត និងចូលរួមកាត់បន្ថយនូវអំពើអបាយមុខក្នុងសង្គម។

បន្ថែមពីលើនេះ លោកអនុប្រធានមន្ទីរលើកឡើងថា ការហាត់ និងលេងកីឡា ជាកត្តាចាំបាច់ ដែលនាំមកនូវ ការស្គាល់យល់គ្នា និងស្រឡាញ់ចូលចិត្តគ្នាទៅវិញទៅមក ធ្វើឱ្យសង្គមជាតិមានការឯកភាព និងសាមគ្គីភាពដ៏រឹងមាំ ក្នុងការកសាង និងការពារជាតិ ព្រមទាំងចូលរួមអភិវឌ្ឍវិស័យកីឡា ស្របតាមយុទ្ធសាស្ត្ររបស់រាជរដ្ឋាភិបាលកំពុងឈានឆ្ពោះទៅរកកម្រិតមួយស្របនឹងការរីកចម្រើនរបស់ប្រទេសជាតិ។លោក អ៊ុក ចន្ថា គូសបញ្ជាក់ថា តាមរបាយការណ៍របស់គណៈកម្មការរៀបចំការប្រកួត ក្រុមដែលបានចូលរួមនាពេលនេះបានខិតខំទៅតាមសមត្ថភាព ដែលខ្លួនបានហ្វឹកហាត់ ហើយបានយកចិត្តទុកដាក់គោរពបទបញ្ជាបច្ចេកទេសនៃប្រភេទកីឡានីមួយៗ ក្នុងការដណ្តើមយកជ័យលាភីនាពេលនេះ ដើម្បីសម្រេចផែនការរបស់ខ្លួន។ លោកក៏បានលើកទឹកចិត្តដល់កីឡាករ កីឡាការិនី ដែលមិនទទួលបាន និងទទួលបានជ័យលាភីទាំងអស់ត្រូវយកចិត្តទុកដាក់បន្តការហ្វឹកហាត់បន្ថែមទៀត ដើម្បីបង្កើនសមត្ថភាព បន្តចូលរួមចំណែកអភិវឌ្ឍន៍វិស័យកីឡាយើងឱ្យកាន់តែរីកចម្រើនបន្ថែមទៀត។

បើតាមប្រធានគណៈកម្មការរៀបចំបានឱ្យដឹងថា ការប្រកួតកីឡាមហាជនជើងឯករាជធានីភ្នំពេញ ឆ្នាំ២០២៤មាន៤ប្រភេទកីឡា ដូចជាបាល់ទាត់ បាល់ទះ បាល់បោះ និងអត្តពលកម្ម ដោយមានប្រតិភូដឹកនាំ គ្រូបង្វឹក កីឡាករ កីឡាការិនី សរុបចំនួន ៧៣៥ នាក់ និងការប្រកួតបានដំណើរការចាប់ពីថ្ងៃទី២០-២៦ ខែមិថុនា ឆ្នាំ២០២៤ នៅទីលានកីឡានៃវិទ្យាល័យជាស៊ីមបឹងកេងកង វិទ្យាល័យវត្តកោះ និងវិទ្យាល័យព្រះយុគន្ធរ។ ឆ្លងកាត់ការប្រកួតយ៉ាងស្វិតស្វាញ គណៈកម្មការបច្ចេកទេសសម្រិតសម្រាំងបានម្ចាស់ជ័យលាភីលើ៤ប្រភេទកីឡាដោយជោគជ័យផងដែរ។