អ្នកប្រដាល់កម្ពុជា និងថៃទទួលបានចាប់អារម្មណ៍ខ្លាំងនៃការប្រកួតកីឡាប្រដាល់អន្តរជាតិគុនខ្មែរប៉ុស្តិ៍លេខ៥ នៅលើសង្វៀន TV5 ព្រែកកំពឹស

ភ្នំពេញ៖ព្រឹត្តិការណ៍ការប្រកួតកីឡាប្រដាល់គុនខ្មែរមានរហ័សនាម “ការប្រកួតកីឡាប្រដាល់អន្តរជាតិ គុនខ្មែរប៉ុស្តិ៍លេខ៥” លើសង្វៀន TV5 ព្រែកកំពឹស នាថ្ងៃទី ១ ខែតុលា ឆ្នាំ២០២៣ អ្នកប្រដាល់កម្ពុជាឈ្នះមួយនាក់ និងអ្នកប្រដាល់ថៃឈ្នះ២នាក់ ដោយអ្នកប្រដាល់ថៃការផ្តួលអ្នកប្រដាល់កម្ពុជាត្រឹមទឹកទី២ ទំាង ២ នាក់ ខណៈអ្នកប្រដាល់ថៃចាញ់ពិន្ទុអ្នកប្រដាល់កម្ពុជា វ៉ាន់ វឿន។

អ្នកប្រដាល់កម្ពុជា វ៉ាន់ វឿន ក្លិបឃ្លាំងមឿងកីឡាបានទទួលជ័យជំនះលើអ្នកប្រដាល់ថៃ Tuon Pe ដោយពិន្ទុទាំងប្រផិតប្រផើយ។ ការប្រកួតទាំង ៥ ទឹករបស់អ្នកប្រដាល់ទាំង ២ រូបនេះពិតជាធ្វើឲ្យអ្នកទស្សនារំភើបចិត្តយ៉ាងខ្លាំងដោយសារតែពួកគេប្ដូរជង្គង់កែងកណ្ដាប់ដៃគ្នាទៅវិញទៅមកបានយ៉ាងអស្ចារ្យ។ ស្ថិតិនៃការវ៉ៃចេញរបស់វ៉ាន វឿនមានប្រសិទ្ធិភាពនិងចំគោលដៅបានល្អជាងការវ៉ៃចេញរបស់Tuon Pe តែបន្តិចបន្តួចប៉ុណ្ណោះទោះជាយ៉ាងណាក៏ជំនួបនេះអ្នកប្រដាល់កម្ពុជាវ៉ាន់វឿនធ្វើបានល្អច្រើន។
ចំណែក អ្នកប្រដាល់ អេលីត សម្ផស្សក្លិបនាយកដ្ឋានអង្គរក្សនៃសមាគមប្រដាល់ក្រសួងមហាផ្ទៃសន្លប់ក្នុង
ទឹកទី ២ ដោយសារជង្គង់របស់អ្នកប្រដាល់ថៃ Phat Phuongsakorn។ ការប្រកួតនេះ សម្ផស្សហាក់ដូចជាមានអំនួតបន្តិចហើងចង់ប្រើពេលវេលាខ្លីដើម្បីផ្ដួលគូប្រកួតនោះធ្វើឲ្យរូបគេហាក់ដូចជាធ្វេសប្រហែសក្នុងការការពារទើបធ្វើឲ្យគេភ្លាត់ស្នៀតបែបនេះ។

នៅទឹកទី១ ទោះបីការប្រកួតធ្វើឡើងក្នុងស្ថានភាពស្ទាបស្ទង់ក៏ពិតមែនតែនៅពេលមានឧិ៍កាសអេលីត សម្ផស្សវាយប្រហារខ្លាំងៗទៅលើគូប្រកួតតែម្ដង។នៅទឹកទី២បន្ទាប់ពីអ្នកប្រដាល់ថៃ Phat Phuongsakorn ដឹងពីរបៀបវ៉ៃរបស់សម្ផស្សនោះគេចាប់ផ្ដើមចេញអាវុធវាយប្រហារធ្វើឲ្យសម្ផស្សបាត់បង់សមត្ថភាពការពារខ្លួន។ ក្នុងស្ថានភាពបែបនេះPhat Phuongsakornក៏បញ្ចេញមួយជង្គង់ចំពោះធ្វើឲ្យសម្ផស្សដួលសន្លប់ក្រោកលែងរួចតែម្ដង។
ចំពោះអ្នកប្រដាល់កម្ពុជា រិនសារដ្ឋ ក្លិបនាគនាំសំណាងនារាយណ៍តេជៈនៃសមាគមប្រដាល់ក្រសួងមហាផ្ទៃប្រកួតចាញ់អ្នកប្រដាល់ថៃ Sarann Gnuo ក្នុងទឹក ទី៥ ដោយពិន្ទុ។ គូនេះក៏តស៊ូជាមួយគ្នាយ៉ាងស្វិតស្វាញដែរតែការវ៉ៃចេញរបស់ Sarann Gnuo ចំគោលដៅបានល្អជាង។
រីឯការប្រកួតរវាងអ្នកប្រដាល់រួមជាតិវិញនោះ ហុន ឈុនហេង ក្លិបជ្រៃសែនជ័យខេត្តកំពង់ស្ពឺយកឈ្នះអ្នកប្រដាល់អេលីតប៊ុនតុងក្លិបនាយកដ្ឋានអង្គរក្សនៅទឹកទី២ដោយវាយឲ្យរបួសលើចិញ្ចើមឆ្វេងហើយត្រូវអាជ្ញាកណ្ដាលបញ្ឈប់។ អ្នកប្រដាល់ ឡុង សេងថងក្លិបខ្លារខិនមានរិទ្ធផ្ដួលអ្នកប្រដាល់តាំង សីហាក្លិបកងពលតូចលេខ៧០ ឲ្យសន្លប់មុនស្នូរជួងបញ្ចប់ទឹកទី១៕