អបអរសាទរ ! ក្រុមជម្រើសជាតិម៉ូតូទឹកកម្ពុជា បាននាំយកភាពជោគជ័យពីការប្រកួត ជើងឯកអាស៊ីនៅជប៉ុន មកដល់មាតុភូមិកំណើតវិញហើយ

ភ្នំពេញ ៖ ក្រុមជម្រើសជាតិម៉ូតូទឹកកម្ពុជា ដែលដឹកនាំដោយកីឡាករ សាលី អូម៉ើត បាននាំយកភាពជោគ ជ័យពីការប្រកួត ជើងឯកអាស៊ីនៅជប៉ុន មកដល់មាតុភូមិកំណើតវិញហើយ ។ ដែលដំណើរមក ដល់ របស់ម្ចាស់ជ័យលាភីរបស់កម្ពុជា មានការអញ្ជើញទទួលស្វាគមន៍យ៉ាងកក់ក្តៅ ពីសំណាក់ ឯកឧត្តម ណុះ ស្លេះ ប្រធានសហព័ន្ធកីឡាម៉ូតូទឹកកម្ពុជា នារសៀលថ្ងៃទី១៣ ខែមិថុនា ឆ្នាំ ២០២៤នេះ នៅអាកាសយាន្តដ្ឋានអន្តរជាតិភ្នំពេញ ។

ថ្លែងក្នុងបទសម្ភាសន៍ជាមួយក្រុមអ្នកសារព័ត៌មាន កីឡាករ សាលី អូម៉ើត បានបង្ហាញអារម្មណ៍ រីករាយ នឹងបានសម្តែងការអរគុណខ្លាំងមែនទែន ចំពោះការទទួលស្វាគមន៍ យ៉ាងអធិអធម ពីសំណាក់ជនរួមជាតិ ។ អូម៉ើត បានអោយដឹងថា សម្រាប់ការទៅចូលរួមព្រឹត្តិការណ៍ A𝘀𝗶𝗮𝗻 𝗖𝗵𝗮𝗺𝗽𝗶𝗼𝗻𝘀𝗵𝗶𝗽𝘀 នៅប្រទេសជប៉ុន ជុំទី១ នេះអត្តពលិកកម្ពុជាពិតជាធ្វើបានល្អខ្លាំងមែនទែន ដោយអាចប្រជែងបានចំណាត់ថ្នាក់ល្អគ្រប់គ្នា ក្នុងចំណោមអត្តពលិកខ្លាំងៗ ជាច្រើនដែលធ្វើ ដំណើរមកពីជាង៦០ប្រទេសក្នុងតំបន់អាស៊ី ។ បើទោះទទួលបានលទ្ធផល ដ៏ល្អបែបនេះក៏ពិត មែន ប៉ុន្តែអត្តពលិកកម្ពុជា ក៏កំពុងមានបញ្ហាប្រឈមមួយចំនួនដែលត្រូវដោះស្រាយផងដែរ នោះ គឺរឿងម៉ូតូទឹកមានអាយុកាលចាស់ ។ ចំពោះបង្ហាញនេះ ត្រូវបាន អូម៉ើត ប្រាប់ថា រាល់ពេល ដែលអត្តពលិកកម្ពុជា ចេញប្រកួតម្តងៗ គឺតែងតែមានភាពរអាក់រអួល បញ្ហាកំហូចម៉ាស៊ីនម៉ូតូ នេះឯង ដែលជាការរាំងស្ទះដល់ការកួតកន្លងមក ។
ដោយសារតែបញ្ហាកំហូតគ្រឿងម៉ាស៊ីនម៉ូតូទឹកនេះ ជារឿងសំខាន់ដែលត្រូវដោះស្រាយ អូម៉ើត បានបញ្ជាក់ថា រូបគេបានស្នើររួមហើយទៅកាន់ម្ចាស់ក្លិប ម៉ូតូទឹករបស់ខ្លួន ដើម្បីធ្វើការផ្លាស់ប្តូរម៉ូតូទឹកថ្មី សម្រាប់ត្រៀមខ្លួនអោយកាន់តែប្រសើរជាងនេះ ក្នុងបន្តរដំណើរទៅចូលរួមការប្រកួត បន្ទាប់ក្នុងព្រឹត្តិការណ៍ 𝗪𝗼𝗿𝗹𝗱 𝗖𝘂𝗽 𝗔𝗻𝗱 𝗪𝗼𝗿𝗹𝗱 𝗦𝗲𝗿𝗶𝗲𝘀 ប្រទេសប៉ូឡូញ ចាប់ពីថ្ងៃទី២៤ ដល់២៨ ខែកក្កដា ឆ្នាំ២០២៤ ដើម្បីនាំយកលទ្ធផលល្អមកជូនជាតិ ។

ចំពោះលទ្ធផលដែលអត្តពលិកម៉ូតូទឹកកម្ពុជាប្រជែងបានពីព្រឹត្តិការណ៍ A𝘀𝗶𝗮𝗻 𝗖𝗵𝗮𝗺𝗽𝗶𝗼𝗻𝘀𝗵𝗶𝗽𝘀 នៅប្រទេសជប៉ុនមកជូនជាតិ ក្នុងនោះរួមមាន ៖ កីឡាករ សាលី អូម៉ើត ប្រជែងបានលេខ១ វិញ្ញាសា Sport GP , កីឡាករ សាលី ហ្វីលីន ប្រជែងបាន លេខ១ លើវិញ្ញាសាវិញ្ញាសា Expert Runabout 1100 Stock , កីឡាករ មីន អូស្មាន់ ប្រជែងបានលេខ១ លើវិញ្ញាសា Novice Ski Stock , កីឡាករ កៃវ៉ាន់ ស៊ីដែន ប្រជែងបានលេខ២ លើវិញ្ញាសា Novice Ski Stock និងកីឡាករ មីន ម៉ូស្តាន ប្រជែងបានលេខ៣ លើវិញ្ញាសា Novice Runabout 1100 Open ៕