ទូកនាគកម្ពុជាចូលរួមប្រកួតលើ៣វិញាសាក្នុងព្រឹត្តិការណ៍ប្រកួតទូកនាគអន្តរជាតិនៅប្រទេសរុស្ស៊ី

ភ្នំពេញ៖ក្រុមជម្រើសជាតិទូកនាគកម្ពុជា និងប្រតិភូ គ្រូបង្វឹក បានទៅដល់ប្រទេសរុស្ស៊ី នាល្ងា ចថ្ងៃទី២៨ ខែ មិថុនា ឆ្នាំ២០២៤ ដើម្បីចូលរួមការប្រកួតកីឡាទូកនាគអន្តរជាតិ Inte rna tio nal Dragon Boat Festival នៅប្រទសរុស្ស៊ី ។

ឯកឧត្តម ចាយ ស៊ីជឿន ប្រធានប្រតិភូ និងជាអគ្គលេខាធិការរង សហព័ន្ធកីឡាទូកកានូ និងរ៉ូអ៊ីងកម្ពុជា បានគូសបញ្ជាក់ឱ្យដឹងដែរថា កីឡាករជម្រើសជាតិទូកនាគកម្ពុជា បានមកដល់ប្រទេសរុស្ស៊ីដោយសុវត្តិភាព ប៉ុន្តែកម្លាំងកាយថាមពលថយចុះបន្តិចបន្ទួច ដោយមូលហេតុធ្វើដំណើរផ្លូវឆ្ងាយ។ តែទោះជាបែបនេះក្តី ក្រោយសម្រាកគ្រប់គ្រាន់ និងហូបចុកបានគ្រប់គ្រាន់ កម្លាំងក៏ទទួលបានត្រឡប់មកវិញប្រមាណជា៩០% ។ 

អគ្គលេខាធិការរង សហព័ន្ធរូបនេះ បានពន្យល់ទៀតថា ចំពោះអាកាសធាតុ នៅរដ្ឋកាល់តៃក្រៃ ប្រទេសរុស្ស៊ី ដែលជាកន្លែងប្រកួតនោះ មានអាកាសធាតុក្តៅបន្តិច និងត្រជាក់បន្តិចនៅពេលយប់ ប៉ុន្តែវាមិនមែនជាឧបសគ្គសម្រាប់ក្រុមជម្រើសជាតិទូកនាគកម្ពុជានោះទេឡើយ។ អគ្គលេខាធិការរង ខាងលើ បានគូសបញ្ជាក់ថា សម្រាប់ការប្រកួតនេះ មាន៩ប្រទេសចូលរួម ក្នុងនោះ មាន៖ ១-កម្ពុជា ២-រុស្ស៊ី ៣-ឥណ្ឌូនេស៊ី ៤-ម៉ាយ៉ាន់ម៉ា ៥-ហ្វីលីពីន ៦-ឥណ្ឌា ៧-អូបេគីស្ថាន ៨-វៀតណាម ៩- ម៉ាឡេស៊ី ខណៈដែលប្រទេសរុស្ស៊ីម្ចាស់ផ្ទះមានច្រើនទូកចូលរួម។

ឯកឧត្តម ស៊ីជឿន បន្ថែមទៀតថា ក្នុងចំណោមប្រទេសចូលរួមទាំង៩នេះ គឺមានប្រទេសខ្លាំងចំនួន២ គឺ ប្រទេសឥណ្តូនេស៊ី និងប្រទេសមីយ៉ាន់ម៉ា សុទ្ធសឹងជាប្រទេសដែលធ្លាប់ដណ្តើមបានមេដាយពីការប្រកួតកម្រិតអេស៊ានហ្គេម អាស៊ី និងស៊ីហ្គេម។ តែទោះជាបែបនេះក្តីក្រុមទូកនាគកម្ពុជា ក៏បានហ្វឹកហាត់និងបង្កើនបច្ចេកទេសបានយ៉ាងល្អប្រសើរ មុននិងទៅចូលរួមការប្រកួតផងដែរ ។សម្រាប់ក្តីសង្ឈឹម គឺកម្ពុជានៅតែដាក់ក្តីសង្ឈឹមខ្ពស់ជានិច្ចលើបេសកម្មដណ្តើមមេដាយជូនជាតិ។

សូមបញ្ជាក់ថា  ការប្រកួតកីឡាទូកនាគអន្តរជាតិInternational Dragon Boat Festival នៅរដ្ឋកាល់តៃក្រៃ ប្រទេសរុស្ស៊ីដំណើរការប្រកួតពីថ្ងៃទី២៩ដល់ថ្ងៃទី៣០ ខែ មិថុនា ឆ្នាំ២០២៤ ក្នុងនោះកម្ពុជាចូលរួមលើ៣វិញ្ញាសាទូកនាគបុរសចំណុះ ១២នាក់ វិញ្ញាសា ២០០ម ,៥០០ម និង២,០០០ម ៕