ប្រតិភូកីឡា លើ៣ប្រភេទកីឡា បាននាំយកភាពជោគជ័យ ការប្រកួតកីឡាសាកលវិទ្យាល័យអាស៊ាន មកដល់មាតុភូមិកំណើត

នាល្ងាចថ្ងៃទី៣ ខែកក្កដា ឆ្នាំ២០២៤ ប្រតិភូកីឡាកម្ពុជាចំនួន២០រូប លើ៣ប្រភេទកីឡា រួមមាន កីឡាយូដូ ប៉េតង់ និងហែលទឹក ចាកចេញពីទីក្រុង SURABAYA ប្រទេសឥណ្ឌូនេស៊ី មកដល់អាកាសយានដ្ឋានអន្តរជាតិក្រុងភ្នំពេញ ប្រទេសកម្ពុជា ដោយសុខសុវត្ថិភាព ។

ដោយមានការទទួលស្វាគមន៍យ៉ាងកក់ក្តៅពីសំណាក់ ឯកឧត្តម សាមឺឌី ស៊ីវឌ្ឍនា រដ្ឋលេខាធិការក្រសួងអប់រំ យុវជន និងកីឡា អមដំណើរដោយលោកដួង មាសចំរើន អគ្គនាយកស្តីទី នៃអគ្គនាយកដ្ឋានកីឡា និងអស់លោក លោកស្រី ក្រុមគ្រួសារសមាជិក និងមន្ត្រីពាក់ព័ន្ធនានា។ សម្រាប់ប្រភេទកីឡា ដែលប្រជែងបានមេដាយពីការប្រកួតកីឡាសាកលវិទ្យាល័យអាស៊ាន សរុប៥គ្រឿងរួមមាន ៖ លើប្រភេទកីឡាប៉េតង់ មេដាយមាស១ ប្រាក់១ និងសំរឹទ្ធិ២ គ្រឿង , ប្រភេទកីឡាយូដូ ទទួលមេដាយ ប្រាក់ ១គ្រឿង។

ដោយឡែកកម្ពុជាយើង នៅសល់៣ប្រភេទកីឡាទៀតដែលកំពុងធ្វើការប្រកួតប្រជែងដណ្តើមមេដាយរួមមាន កីឡាអត្តពលកម្ម ការ៉ាតេ និងតេក្វាន់ដូWT ។
គិតត្រឹមថ្ងៃទី៣ ខែកក្កដា ឆ្នាំ២០២៤ កម្ពុជាយើងទទួលបានមេដាយសរុបចំនួន ៦គ្រឿង មាស១ ប្រាក់៣ សំរឹទ្ធិ២៕