យុទ្ធគុនចម្រុះខ្មែរបុរាណ នឹងមានការផុលផុស ប្រសិនមានការជួយពីគ្រប់ប្រព័ន្ធផ្សព្វផ្សាយ

ឯកឧត្តម វ៉ាត់ ចំរើន អនុប្រធានអចិន្ត្រៃយ៍ គណៈកម្មកាចំពោះកិច្ចរៀបចំ ការប្រកួតយុទ្ធគុនចម្រុះខ្មែរបុរាណ ពានរង្វាន់សម្តេចធិបតី បានរៀបចំកិច្ចប្រជុំ ជួបសំណេះសំណាល ជាមួយបណ្តាលប្រព័ន្ធផ្សព្វផ្សាយមកពីគ្រប់ទិសទី ក្នុងប្រទេសកម្ពុជា នាព្រឹកថ្ងៃទី៩ ខែកញ្ញាម្សិលមិញ នៅទីស្នាក់ការគណៈកម្មាធិការជាតិអូឡាំពិកកម្ពុជា ។

ឯកឧត្តម វ៉ាត់ ចំរើន បានចាត់ទុកថា ប្រព័ន្ធផ្សព្វផ្សាយទាំងអស់ រួមទាំងអ្នកផ្សព្វផ្សាយតាមផេកទំនាក់ទំនងសង្គម ជាអ្នករួមចំណែកដ៏សំខាន់ ក្នុងការគាស់កកាយអ្នកយុទ្ធគុនខ្មែរមកពីគ្រប់ទិសទីទាំងអស់ឱ្យមកចូលរួមប្រកួត ក្នុងព្រឹត្តិការណ៍ថ្នាក់ជាតិដ៏ធំជាលើកដំបូងនេះ។ កាលណាមានការចូលរួមផ្សព្វផ្សាយអោយមានការផុលផុសទៅកាន់មហាជនកាន់តែខ្លាំង និងជួយបំផុសស្មារតីឱ្យកូនខ្មែរគ្រប់ៗរូបទូទាំងប្រទេស និងកូនខ្មែរនៅក្រៅប្រទេសសូមចូលរួមលើកតម្កើងគុណតម្លៃយុទ្ធគុនចម្រុះខ្មែរបុរាណជាព្រលឹងវប្បធម៌ អរិយធម៌ខ្មែរ ដែលបុព្វបុរសខ្មែរបានបន្សល់ទុកតាំងពីបុរាណកាល មកដល់បច្ចុប្បន្ន។

ឯកឧត្តម វ៉ាត់ ចំរើន ពន្យល់ថា យុទ្ធគុន ឬអ្នកខ្លះហៅថា យុទ្ធសិល្បិ៍ ដែលមានន័យថា សិល្បៈនៃការប្រយុទ្ធ ដែលមានន័យដូចគ្នា ប៉ុន្តែពាក្យខ្មែរដែលប្រើឱ្យចំតែម្តង គឺ«យុទ្ធគុន»។ យុទ្ធគុនខ្មែរបុរាណនីមួយៗ តែងតែមានលក្ខណៈពិសសេស។ ជាមួយគ្នានេះ ឯកឧត្តមបានក្រើនរម្លឹកអំពីជីវប្រវត្តិនៃយុទ្ធគុនខ្មែរ ហើយឱ្យកូនខ្មែរទាំងអស់គ្នាត្រូវតែមានមោទនភាពថា យើងពិតជាមានដូនតាខ្មែរយើងចេះយុទ្ធគុនរបស់ខ្លួនខ្លាំងពូកែប្រាកដមែន។
បន្ថែមពីលើនេះ ក្នុងពិធីសំណេះសំណាលនេះ ឯកឧត្តម វ៉ាត់ ចំរើន ក៏បានលើកបង្ហាញពីជីវប្រវត្តិ ព្រលឹងយុទ្ធគុនចម្រុះខ្មែរបុរាណទាំងអស់ ដែលបុព្វបុរស ព្រមទាំងអតីតព្រះមហាក្សត្រគ្រប់ៗជំនាន់បានថែរក្សាទឹកដីតាំងពីបុរាណកាលរហូតដល់បច្ចុប្បន្ន តាមរយៈការចេះយុទ្ធគុន យុទ្ធសិល្បិ៍ យុទ្ធមន្តគ្រប់ទម្រង់ ក្នុងការប្រយុទ្ធប្រឆាំង ដើម្បីការពារទឹកដីពិតប្រាកដ។ បន្ថែមពីលើនេះ ឯកឧត្តមអនុប្រធានអចិន្ត្រៃយ៍ ក៏បានបំផុសឱ្យប្រព័ន្ធផ្សព្វផ្សាយទាំងអស់ជួយបំផ្ទុះផ្សព្វផ្សាយឱ្យបានខ្លាំងក្លា ដើម្បីជួយបញ្រាបការផ្សព្វផ្សាយការប្រកួតកីឡាយុទ្ធគុនចម្រុះខ្មែរបុរាណ ពានរង្វាន់សម្តេចធិបតី លើកទី១ ឆ្នាំ២០២៤ឱ្យកាន់ជ្រួតជ្រាបដល់មហាជន ដើម្បីដាស់ស្មារតីកូនខ្មែរបានស្គាល់ បានដឹងនូវគុណូបការៈដ៏ធំធេងរបស់ព្រលឹងដូនតាខ្មែរ ក្នុងន័យអភិរក្ស និងអភិវឌ្ឍយុទ្ធគុនចម្រុះបុរាណខ្មែរឱ្យបានគង់វង្សយូរអង្វែង៕