ប្រតិភូ គ្រូបង្វឹក កីឡាករ កីឡាការិនី ១៦៧៧នាក់ចាប់ផ្តើមការប្រកួតកីឡាសិស្សបឋមសិក្សាថ្នាក់ជាតិ ២០២២
ភ្នំពេញ ៖ បើតាមការបញ្ជាក់ពីលោក ហួត សេងទ្រី ប្រធាននាយកដ្ឋានរៀបចំ និងគ្រប់គ្រងព្រឹត្តិការណ៍កីឡានៃក្រសួងអប់រំ យុវជន និងកីឡាបានឲ្យដឹងថា ការប្រកួតកីឡាសិស្សបឋមសិក្សាថ្នាក់ជាតិ ២០២២ ទទួលបានប្រតិភូ គ្រូបង្វឹក កីឡាករ កីឡាការិនី ១៦៧៧នាក់ ជម្រើសចេញពីសាលាបឋមសិក្សាទូទាំងប្រទេសចូលរួមប្រកួត ។
ហួត សេងទ្រី អោយដឹងនៅក្នុងពិធីបើកការប្រកួតកីឡាសិស្សបឋមសិក្សាថ្នាក់ជាតិ ប្រចាំឆ្នាំ២០២២ នាថ្ងៃល្ងាចថ្ងៃទី៣០ ខែមេសា ឆ្នាំ២០២២ នៅវិទ្យាស្ថាន ជាតិអប់រំកាយ និងកីឡា ថា ព្រឹត្តិការណ៍ថ្នាក់ជាតិនេះដាក់អោយប្រកួតលើ៨ប្រភេទកីឡា ស្មើនឹង៣៤វិញ្ញាសា ដែលមានប្រភេទ កីឡាបាល់ទាត់ បាល់ទះ បាល់បោះ អត្តពលកម្ម វាយសី វាយកូនឃ្លីលើតុ តេក្វាន់ដូ WT និង តេក្វាន់ដូ ITF ដែលមានប្រតិភូ គ្រូបង្វឹក កីឡាករ កីឡាការិនី ១៦៧៧នាក់ ដែលបានប្រព្រឹត្តទៅចាប់ពីថ្ងៃទី២៩ ខែមេសា ដល់ថ្ងៃទី០៨ ខែឧសភា ឆ្នាំ២០២២ ។
សូមបញ្ជាក់ថា ការប្រកាសបើកជាផ្លូវការ ការប្រកួត កីឡាសិស្សបឋមសិក្សាថ្នាក់ជាតិ ប្រចាំឆ្នាំ២០២២នេះ មានការអញ្ជើញចូលរួមប្រកាសបើជាផ្លូវការក្រោមវត្តមាន ឯកឧត្តម ប៊ូ ជុំសេរី អនុរដ្ឋលេខាធិការ ក្រសួងអប់រំ យុវជន និងកីឡា តំណាងដ៏ខ្ពង់ខ្ពស់ ឯកឧត្តមបណ្ឌិតសភាចារ្យរដ្ឋមន្ត្រីក្រសួងអប់រំ យុវជន រួមជាលោកគ្រូអ្នកគ្រូ និងកីឡាករកីឡាការិនីជាច្រើនផងដែរ ៕
