ក្លិបកីឡាតេក្វាន់ដូ WT វិទ្យាល័យ ហ៊ុន សែន សេរីភាពក្រុងតាខ្មៅ នឹងក្លាយជាចំណែកដ៏សំខាន់សម្រាប់ស្វែងរកយុវជនថ្នាល់ត្រៀមស៊ីហ្គេម នៅកម្ពុជា

ខេត្តកណ្តាល ៖ ក្លិបកីឡាតេក្វាន់ដូ WT វិទ្យាល័យ ហ៊ុន សែន សេរីភាពក្រុងតាខ្មៅ បានប្រកាសបើកសម្ពោធដាក់អោយប្រើប្រាស់ជាផ្លូវការ នាព្រឹកថ្ងៃទី១០ ខែកក្កដា ឆ្នាំ២០២២ ក្រោមវត្តមានលោក ម៉ៅ ស្រេង អនុប្រធានខេមរសហព័ន្ធតេក្វាន់ដូ WT តំណាងឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា និងជាប្រធានខេមរសហព័ន្ធ លោក IM JONG NAM អនុប្រធានសមាគមតេក្វាន់ដូខ្យុងហ្គីដូ លោកបណ្ឌិត ជ្រិន សុធា អគ្គលេខាធិការ លោក ចេង សំអ៊ុល ប្រធានមន្ទីរអប់រំ យុវជន និងកីឡាខេត្ត និងលោក ស្រី ស្រឿន នាយករងវិទ្យាល័យ ហ៊ុន សែន សេរីភាព និងជាអនុប្រធានក្លិបកីឡាតេក្វាន់ដូ WT វិទ្យាល័យ ហ៊ុន សែន សេរីភាព។

លោក ស្រី ស្រឿនបានបញ្ជាក់ថា ក្លិបកីឡាតេក្វាន់ដូ WT វិទ្យាល័យ ហ៊ុន សែន សេរីភាពបង្កើតឡើងក្នុងគោលបំណងរួមចំណែកអភិវឌ្ឍកីឡា និងបំផុសប្រភេទកីឡាតេក្វាន់ដូ WT ឲ្យសិស្សានុសិស្សបានស្គាល់ និងជាការផ្តល់ឱកាសដល់យុវជនថ្នាលបានចូលរួមប្រកួតប្រជែង ដើម្បីជ្រើសរើសសិស្សដែលមានទេពកោសល្យតំណាងខេត្តកណ្តាល ចូលរួមប្រកួតកីឡាសកលវិទ្យាល័យជាតិ និងអន្តរជាតិផ្សេងៗទៀត។

លោក ម៉ៅ ស្រេង បានមានប្រសាសន៍ថា ក្នុងនាមខេមរសហព័ន្ធតេក្វាន់ដូ ខ្ញុំសូមថ្លែងអំណរគុណយ៉ាងជ្រាលជ្រៅបំផុត ចំពោះវត្តមានរបស់លោកអនុប្រធាន និងលោកអគ្គលេខាធិការសមាគមតេក្វាន់ដូខ្យុងហ្គីដូ នៃសាធារណរដ្ឋកូរ៉េ ដែលបានជួយឧបត្ថម្ភជាថវិកាដើម្បីជួសជុលកែលម្អអាគារ១ខ្នង នៅវិទ្យាល័យ ហ៊ុនសែន សេរីភាពឲ្យទៅជាក្លិបកីឡាតេក្វាន់ដូWT សម្រួលដល់ការបង្ហាត់ក្បាច់គុនតេក្វាន់ដូផ្នែក WT ជាប្រភេទកីឡាអូឡាំពិកក្នុងការផ្សព្វផ្សាយឲ្យសិស្សានុសិស្ស និងបងប្អូនប្រជាពលរដ្ឋនៅក្រុងតាខ្មៅ ខេត្តកណ្តាល បានស្គាល់បានយល់ពីវិញ្ញាសាតេក្វាន់ដូ WT ដែលគណៈកម្មាធិការជាតិ CAMSOC ត្រៀមដាក់បញ្ចូលទៅក្នុងព្រឹតិ្តការណ៍នៃការប្រកួតកីឡា SEA GAMES 2023 លើកទី៣២ ខាងមុខ។
លោកបានបន្តថា គណៈគ្រប់គ្រងវិទ្យាល័យ ហ៊ុន សែន សេរីភាពបានផ្តល់នូវទីតាំងក្នុងបរិវេណវិទ្យាល័យសម្រាប់បង្កើតក្លិបកីឡាតេក្វាន់ដូWTនេះឡើង ជាការរួមចំណែកអនុវត្តកម្មវិធីសិក្សារបស់ក្រសួងអប់រំ យុវជន និងកីឡាក្នុងការត្រៀមដាក់បញ្ចូលប្រភេទកីឡាតេក្វាន់ដូ។ វាជាកត្តាចាំបាច់បំផុតសម្រាប់ពលរដ្ឋគ្រប់រូបត្រូវយល់ដឹង និងអនុវត្តតាមរយៈការហ្វឹកហាត់កីឡា ព្រោះកីឡានាំមកនូវសុខភាព មិត្តភាព សាមគ្គីភាព និងការអភិវឌ្ឍ ដូចពាក្យស្លោកមួយឃ្លា “ប្រជាពលរដ្ឋម្នាក់ លេងកីឡាមួយប្រភេទ ក្នុងជីវិត” ព្រោះវាអាចជួយឲ្យយើងជៀសផុតពីគ្រឿងញៀន និងអំពើអបាយមុខផ្សេងៗផងដែរ។
លោកសង្ឃឹមថា ក្លិបកីឡាតេក្វាន់ដូ WT វិទ្យាល័យ ហ៊ុន សែន សេរីភាពក្រុងតាខ្មៅ នឹងក្លាយជាចំណែដ៏សំខាន់សម្រាប់បណ្តុះបណ្តាល នឹងស្វែងរកយុវជនថ្នាល់សម្រាប់ត្រៀមចូលរួមការប្រកួតជាលក្ខណៈជាតិ និងអន្តរជាតិនានា ជាពិសេសត្រៀមស៊ីហ្គេម លើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះ ។

គួរអោយដឹងផងដែរថា ក្លិបកីឡាតេក្វាន់ដូ WT វិទ្យាល័យ ហ៊ុន សែនសេរីភាព បានប្រើប្រាស់ថវិកាជួសជុលកែលម្អអស់១២០០០ដុល្លារអាមេរិក ក្រោមការឧបត្ថម្ភ ពីសមាគមតេក្វាន់ដូខ្យុងហ្គីដូ។ ក្លិបនេះមានបណ្តោយប្រវែង ៤៨ ម៉ែត្រ និងទទឹងវែង ៧ ម៉ែត្រ ព្រមទំាងយ៉ប្រវែង ២ ម៉ែត្រ ក្នុងនោះមាន៣បន្ទប់រួមមានបន្ទប់ហ្វឹកហាត់ធំមួយមានបណ្តោយប្រវែង ២៤ ម៉ែត្រ និងទទឹងប្រវែង ៧ ម៉ែត្រ បន្ទប់ហ្វឹកហាត់តូចមួយបណ្តោយប្រវែង ១៦ ម៉ែត្រ និងទទឹងប្រវែង ៧ ម៉ែត្រ និងបន្ទប់ការិយាល័យមួយសម្រាប់ប្រជុំមានបណ្តោយប្រវែង ៨ ម៉ែត្រ និងទទឹងប្រវែង ៧ ម៉ែត្រ៕