ក្រុមខ្លាំងទាំង៤ប្រភេទអាយុនៃព្រឹត្តិការណ៍ការប្រកួតបាល់ទាត់កុមារ និងយុវជន AIA – ISF Youth League នៅមណ្ឌលក្រុងភ្នំពេញបានរកឃើញហើយ

បាល់ទាត់ ៖ ក្រុមបាល់ទាត់បុរសនារីដែលខ្លាំងៗទាំង៤ប្រភេទអាយុនៃព្រឹត្តិការណ៍ការប្រកួតបាល់ទាត់កុមារ និងយុវជន AIA – ISF Youth League នៅក្រុងភ្នំពេញបានរកឃើញហើយ កាលពីថ្ងៃអាទិត្យ ទី១៧ ខែកក្កដា ឆ្នាំ២០២២ បន្ទាប់ពីចំរាញ់អស់រយៈពេលជាច្រើនសប្តាហ៍ នៅទីលានអង្គការផ្កាយសមុទ្រ ស្ថិតនៅក្នុង ខណ្ឌ ដង្កោ រាជធានីភ្នំពេញ។

អ្នកស្រី ជួប វិច្ឆិកា ប្រធានអង្គការផ្កាយសុមទ្រ បានបញ្ជាក់ឲ្យដឹងថា ព្រឹត្តិការណ៍ប្រកួតបាល់ទាត់កុមារ និងយុវជន AIA – ISF Youth League គឺជាការប្រកួតបាល់ទាត់ថ្នាក់ សហគមន៍មួយ ដែលមានគោលដៅផ្តល់ឱកាសស្មើរគ្នាក្នុងការលេងបាល់ទាត់ដល់កុមារ និងយុវជន រងផលប៉ះពាល់ដោយសារភាពក្រីក្រ ការរើសអើងយេនឌ័រ និងសង្គម ។បានបង្កើតឡើងចាប់ពីឆ្នាំ២០១៧មក ដើម្បីរួមចំណែកជួយកាត់បន្ថយភាពក្រីក្រ តាមរយៈការអប់រំ សេវាថែទាំសុខភាព និងកីឡា ដោយសហការយ៉ាងជិតស្និតជាមួយនឹងអង្គការក្រៅរដ្ឋាភិបាល សាលារៀន និងស្ថាប័នពាក់ព័ន្ធជាច្រើន ក្នុងការផ្តល់ឱកាសហ្វឹកហាត់ និងប្រកួតបាល់ទាត់ដល់កុមារ និងយុវជន ដែលមិនមានឱកាសចូលរួម ក្នុងសកម្មភាពទាំងនេះ ។

អ្នកស្រី ប្រធានអង្គការ បានគូសបញ្ជាក់ថា ព្រឹត្តិការណ៍ប្រកួតបាល់ទាត់កុមារ និងយុវជន AIA – ISF Youth League 2022 យើងបានពង្រីកទៅកាន់រាធានី ខេត្តចំនួន៤ រាជធានីភ្នំពេញ កំពត សៀមរាប និងខេត្តកំពង់ស្ពឺ ហើយ៤ប្រភេទអាយុខ្លាំងដែលចំរាញ់ជ្រើសរើសបានពីការប្រកួតមណ្ឌលនីមួយៗនឹងមកប្រកួតដណ្តើមពានធំនៅរាជធានីភ្នំពេញនៅថ្ងៃទី១៤ ខែសីហាខាងមុខនេះ ។

លោក រ៉ែន ពិសាល ប្រធានផ្នែកទំនាក់ទំនងនៃក្រុមហ៊ុនអេ អាយ អេ មានប្រសាសន៍ លើកឡើងថា ការចាប់ដៃសហការជាដៃគូជាមួយអង្គការផ្កាយសមុទ្ររយៈពេល៤ឆ្នាំនេះ ក្រុមហ៊ុន អេ អាយអេ ពិតជាមានក្តីសប្បាយរីករាយយ៉ាងខ្លាំង ដែលបានរួមចំណែកផ្តល់ឱកាសឲ្យកុមារនិងយុវជនក្រីក្រនៅកម្ពុជារាប់ពាន់នាក់ បានចូលរួមលេងកីឡា ទទួលបាននូវសុខមាលភាព ។ លោក សង្ឈឹមជឿជាក់ថា កិច្ចសហការរួមគ្នា តាមរយៈការបង្កើតព្រឹត្តិការណ៍បាល់ទាត់នេះ នឹងជួយឲ្យកុមារនិងយុវជនក្រីក្រនៅក្នុងសហគមន៍ក្នុងប្រទេសកម្ពុជាបានក៏សាងអភិវឌ្ឍសមត្ថភាពក្លាយជាកីឡាករកីឡាការិនីបាល់ទាត់អាជីព ជួយឲ្យវិស័យបាល់ទាត់នៅកម្ពុជាឲ្យកាន់តែរីកចំរើន។

សូមបញ្ជាក់ថា អង្គការផ្កាយសមុទ្រ និងក្រុមហ៊ុន AIA Cambodia បានកំណត់យកថ្ងៃទី១៤ ខែសីហា ដើម្បីរៀបចំព្រឹត្តិការណ៍ប្រកួតផ្តាច់ព្រ័ត្រ AIA – ISF Grand Championship League ដែលការ ប្រកួតនេះមិនត្រឹមតែរួមចំណែកដល់ការបង្កើតសហគមន៍កីឡានៅទូទាំងប្រទេស តែថែមទាំងជម្រុញ ស្មារតីស្រលាញ់កីឡា សាមគ្គីភាព និងការកំណត់គោលដៅសម្រាប់កីឡាករ និងកីឡាការនីទាំងនោះ ទៀតផង ។
សម្រាប់លទ្ធផលនៃការកួតសម្រាប់មណ្ឌលរាធានីភ្នំពេញ ក្រុមបាល់ទាត់អាយុក្រោមនារីអាយុក្រោម១៨ឆ្នាំចំណាត់លេខ១បានទៅលើ PSE អាយុក្រោម១៤ឆ្នាំនារីចំណាត់លេខ១បានទៅលើISF SMC ផ្នែកបុរសអាយុ១៦ឆ្នាំ លេខ១បានទៅលើក្រុមបាល់ទាត់ISF CA .អាយុក្រោម១៤បុរស ចំណាត់ថ្នាក់លេខ១បានទៅលើក្រុមបាល់ទាត់ សាលាPONHEAPON.បុរសអាយុក្រោម១០ឆ្នាំក្រុមបាល់ទាត់ISF CA៕