ប្រធានសហព័ន្ធខ្មែរកីឡាហាប់គីដូ លើកទឹកចិត្តដល់សមាជិកប្រតិបត្តិ និងអត្តពលិកទាំងអស់ អោយខិតខំបន្ថែមទៀត ដើម្បីអភិវឌ្ឍវិស័យកីឡាហាប់គីដូឲ្យកាន់តែរលូន

ភ្នំពេញ ៖ លោកឧកញ៉ា សៅ សេងហាក់ ប្រធានសហព័ន្ធខ្មែរកីឡាហាប់គីដូបាន លើកទឹកចិត្តដល់សមាជិកប្រតិបត្តិ និងគ្រូបង្គោល ព្រមទាំងកីឡាករ កីឡាការិនី ត្រូវខិតខំបន្ថែមទៀតដើម្បីអភិវឌ្ឍវិស័យកីឡាហាប់គីដូឲ្យកាន់តែរលូន និងទទួលបានជោគជ័យនាពេលខាងមុខ ។

ក្នុងឱកាសអញ្ជើញជួបសំណេះសំណាល និងត្រួតពិនិត្យមើលលើសកម្មភាពប្រចាំត្រីមាស នៅក្នុងអាណត្តិទី៧ ដើម្បីសម្រួចទិសដៅអភិវឌ្ឍវិស័យកីឡាហាប់គីដូឲ្យកាន់តែរីកចម្រើនបន្ថែមទៀត កាលពីល្ងាចថ្ងៃទី២៤ ខែកក្កដា ឆ្នាំ២០២២ នៅសាលនៃពហុកីឡដ្ឋានជាតិអូឡាំពិកលោកឧកញ៉ា សៅ សេងហាក់ បានជំរុញឲ្យកីឡាករ កីឡាការិនីខិតខំហ្វឹកហាត់បង្កើនបច្ចេកទេស ដើម្បីអភិវឌ្ឍសមត្ថភាពឲ្យកាន់តែល្អប្រសើរ ក្នុងការទទួលបានឱកាសក្លាយជាគ្រូបង្គោលនាថ្ងៃអនាគត។

ប្រធានសហព័ន្ធរូបនេះបានលើកឡើងថា ការមកចូលរួមដឹកនាំរបស់គណៈកម្មាធិការប្រតិបត្តិសហព័ន្ធ មិនមែនជាការស្វែងរកផលចំណេញនោះទេ ប៉ុន្តែដោយសារតែឆន្ទៈស្រឡាញ់ ទើបលោកឧកញ៉ា និងសមាជិកទាំងអស់បានលះបង់ជួយជ្រោមជ្រែងអភិវឌ្ឍវិស័យកីឡាមួយនេះ។
លោក គង់ ចាន់ធីណា អគ្គលេខាធិការ សហព័ន្ធខ្មែរកីឡាហាប់គីដូ និងជាគ្រូបង្វឹកផងនោះបានជម្រាបជូនអង្គពិធីថា ដោយបានអនុវត្តនូវការងារមួយចំនួន កន្លងមក ជាពិសេស ក្នុង១ត្រីមាស នៃអាណត្តិទី៧នេះ សហព័ន្ធបាននូវសមិទ្ធផលមួយចំនួន ដូចជាការបណ្តុះបណ្តាលកីឡាករ កីឡាការិនី បានបើកវគ្គបង្ហាត់ស្នៀតជំនាញបច្ចេកទេស ដើម្បីការពារសន្តិសុខទៅដល់ក្រុមគ្រូបង្គោលមកពីសាលាបណ្ឌិតសភានគរបាលជាតិ រយ:ពេល ៣ ខែ ចាប់តាំងពីខែមេសា រហូតដល់ខែមិថុនា ឆ្នាំ២០២២។ ក្នុងពេលដំណាលគ្នានេះ សហព័ន្ធបានបើកវគ្គហាប់គីដូបង្ហាត់ទៅដល់ក្រុមកងកម្លាំងមកពីបញ្ជាការដ្ឋានកងអង្គរក្សសម្តេចតេជោ ហ៊ុន សែន ចាប់ពីខែមេសា រហូតមកបច្ចុប្បន្ន និងបានរៀបចំការប្រឡងឡើងខ្សែក្រវ៉ាត់តាមក្លិបនីមួយៗរយៈពេល៣ដង។

អគ្គលេខាធិការរូបនេះបន្ថែមទៀតថា សហព័ន្ធខ្មែរកីឡាហាប់គីដូមានក្លិបចំនួន ៤ក្លិប និងសិស្សគុនសរុបប្រមាណ ៧២នាក់។ បន្ទាប់ពីសហព័ន្ធខ្មែរកីឡាហាប់គីដូបានបោះឆ្នោតជ្រើសរើសប្រធានដឹកនាំថ្មីមក ដែលមានលោកឧកញ៉ា សៅ សេងហាក់ ជាប្រធាន លោកប្រធានបានចាត់ចែង ដឹកនាំកិច្ចប្រជុំរៀបចំឯកសារពាក់ព័ន្ធ និងដាក់ទិសដៅការងារជាបន្តបន្ទាប់ ដោយមានកិច្ចសហការផ្ទៃក្នុងល្អ ប្រកបដោយសុខដុមនីយកម្ម ហើយទទួលបានការគាំទ្រពីក្រសួងអប់រំ យុវជន និងកីឡា និងបានទទួលសេចក្តីសម្រេចតែងតាំងថ្នាក់ដឹកនាំសហព័ន្ធខ្មែរកីឡាហាប់កីដូ ពីគណ:កម្មាការជាតិអូឡាំពិក៕