អនាគតរបស់ Gareth Bale នៅ Real Madrid នឹងកំណត់ក្រោយ Wales បញ្ចប់យុទ្ធនាការ World Cup

Gareth Bale នឹងធ្វើការសម្រេចចិត្តលើអនាគតជាមួយក្លឹប Real Madrid បន្ទាប់ពីក្រុមជម្រើសជាតិ Wales បញ្ចប់យុទ្ធនាការ World Cup ។ Bale វ័យ 32 ឆ្នាំបានស៊ុតបាល់បញ្ចូលទីដ៏អស្ចារ្យ២គ្រាប់ក្នុងការប្រកួតវគ្គពាក់កណ្តាលផ្តាច់ព្រ័ត្រ World Cup របស់ Wales លើប្រទេសអូទ្រីសកាលពីថ្ងៃព្រហស្បតិ៍សប្តាហ៍មុន ដើម្បីឡើងទៅរងចាំប្រកួតចុងក្រោយជាមួយនឹងស្កុតឡែន ឬអ៊ុយក្រែន។

ការប្រកួតត្រូវបានពន្យារពេលដោយសារការឈ្លានពានរបស់រុស្សីមកលើអ៊ុយក្រែន ដោយការប្រកួតវគ្គផ្តាច់ព្រ័ត្រនឹងត្រូវលេងនៅខែមិថុនា។ កុងត្រារបស់ Bale នៅ Real Madrid នឹងផុតកំណត់នៅដំណាច់រដូវកាលនេះ។

ភ្នាក់ងាររបស់ Bale លោក Jonathan Barnett បានប្រាប់ BBC Sport Wales ថា “យើងមិនទាន់បានពិភាក្សាអ្វីនៅឡើយទេ” ។ “នៅពេលដែលយើងដឹងពីស្ថានភាពរបស់ Wales ជាមួយ World Cup យើងនឹងពិភាក្សាវានៅពេលនោះ។”
សូមជម្រាប់ថា Bale បានឈ្នះពានរង្វាន់ចំនួន 14 ក្នុងអំឡុងពេល៩ឆ្នាំនៅ Real រួមទាំងពានរង្វាន់ Champions League ចំនួន 4 ប៉ុន្តែ Bale បានប្រឈមមុខនឹងការរិះគន់នៅក្នុងប្រទេសអេស្ប៉ាញសម្រាប់កំណត់ត្រារបួសរបស់គេ ៕

ប្រភព ៖ BBC Sport