អត្តពលិកក្លឹបក្រសួងមហាផ្ទៃដណ្តើមបានមេដាយច្រើនជាងគេពីការប្រកួតកីឡាតេក្វាន់ដូ ITF ជើងឯកថា្នក់ជាតិ ប្រចាំឆ្នាំ ២០២២
ភ្នំពេញ៖ ក្រុមកីឡាករ-កីឡាការិនីតេក្វាន់-ដូ ITF របស់ក្លឹបក្រសួងមហាផ្ទៃដណ្តើមបានមេដាយច្រើនជាងគេពីការប្រកួតជ្រើសរើសជើងឯកថ្នាក់ប្រចាំឆ្នាំ២០២២ ដែលបានដំណើរការប្រកួតយ៉ាងស្វិតស្វាញនឹងបានបិទបញ្ចប់ការប្រកួតជាផ្លូវកាកាលពីថ្ងៃទី៣០ ខែកញ្ញា នៅសាកលវិទ្យាល័យភូមិន្ទភ្នំពេញ។
លោក បួនហ៊ីង សុធីយ៉ា អគ្គលេខាធិការសហព័ន្ធកីឡាតេក្វាន់ដូ ITF បានអោយដឹងថា ការប្រកួតកីឡាតេក្វាន់-ដូ ITF ជ្រើសរើសជើងឯកប្រថ្នាក់ជាតិនេះមានកីឡាករ-កីឡាការិនីចូលរួមចំនួន១៣៨នាក់ កីឡាការិនី ៤៨នាក់ និងកីឡាករ ៩០នាក់មកពីក្លិបចំនួន១៧ នៅទូទាំងរាជធានីខេត្ត។ អគ្គលេខាធិការរូបនេះ បានបញ្ជាក់ថា បើការសង្កេតមើលជាក់ស្តែម លោកមើលឃើញពីការកើនឡើងសម្ធិភាពមិនខ្លាំងណាស់ណាទេ ប៉ុន្តែក្នុ្ងងកម្រិតមួយដែលអាចទទួលយកបាន ។ អគ្គលេខាធិការ ដដែលបញ្ជាក់ទៀតថា សម្រាប់ការប្រកួតជើងឯកថ្នាក់ជាតិនេះ ក៏ជាការវាសស្ទង់សមត្ថិភាពអត្តពលិកជម្រើសជាតិ និងស្វែងរកធនធានថ្មីៗ ដែលមានសក្តានុពលសម្រាប់ជ្រើសរើសមកចូលហ្វឹកហាត់ក្នុងក្រុមជម្រើសជាតិ ដើម្បីត្រៀមខ្លួន ចូលរួមការប្រកួតជ្រើសរើសជើងឯកពិភពលោកនៅប្រទេសឥណ្ឌា នាខែសីហា ឆ្នាំ២០២៣ ខាងមុខផងដែរ ។
ជាមួយគ្នានោះឯកឧត្តម កែវ រ៉េមី ប្រធានសហព័ន្ធក៏សុំកោតសរសើរ និងវាយតម្លៃខ្ពស់ចំពោះក្មួយៗ ប្អូនៗ ជាកីឡាករ កីឡាការិនី ដែលបានប្រឹងប្រែងហ្វឹកហាត់សម្រាប់ចូលរួមការប្រកួតជើងឯកថ្នាក់ជាតិនាពេល ដែលបានបង្ហាញពីក្តីស្រលាញ់ពេញចិត្តចំពោះកីឡាប្រភេទនេះផងដែរ ។ ទន្ទឹមគ្នានោះឯកឧត្តម ក៏បានសម្តែងនូវការសោកស្តាយចំពោះការបរាជ័យក្នុងកាបញ្ចូលប្រភេទកីឡាតេក្វាន់ដូ ITF ចូលទៅក្នុងព្រឹត្តិការណ៍ប្រកួតកីឡាស៊ីហ្គេមលើកទី ៣២ ឆ្នាំ២០២៣ ផងដែរ ។
សូមបញ្ជាក់ថា សម្រាប់លទ្ធផលនៃការប្រកួតកីឡាតេក្វាន់ដូ ITF ជ្រើសរើសជើងឯក ថា្នក់ជាតិ ប្រចាំឆ្នាំ ២០២២នេះ ក្លឹបក្រសួងមហាផ្ទៃដណ្តើមបានមេដាយមាសច្រើនជាងគេសរុបចំនួន២០គ្រឿងរួមមានមេដាយមាស ៨ គ្រឿង ប្រាក់ ៤គ្រឿង និងសំរិទ្ធ ៨ គ្រឿង ក្រសួងសេដ្ឋកិច្ច និងហិរញ្ញវត្ថុជើងឯករងដណ្តើមបានមេដាយសរុប១៤គ្រឿងរួមមានមេដាយមាស ២ គ្រឿង ប្រាក់ ៤គ្រឿង និងសំរិទ្ធ ៨ គ្រឿង ពន្លឺយុវជនដណ្តើមបានមេដាយសរុប៥គ្រឿងរួមមានមេដាយមាស ២ គ្រឿង និងប្រាក់ ៣គ្រឿង និងស.ស.យ.ក ខេត្តកំពង់ស្ពឺ ដណ្តើមបានមេដាយសរុប៦គ្រឿងរួមមានមេដាយមាស ២ គ្រឿង ប្រាក់ ២គ្រឿង និងសំរិទ្ធ ២ គ្រឿង ។ចំណែកវិទ្យាស្ថានបច្ចេកវិទ្យាប្រាជ្ញាសាស្រ្តដណ្តើមបានមេដាយសរុប៦គ្រឿងរួមមានមេដាយមាស ២ គ្រឿង ប្រាក់ ១គ្រឿង និងសំរិទ្ធ ៣ គ្រឿង សេរីភាពដណ្តើមបានមេដាយសរុប៣គ្រឿងរួមមានមេដាយមាស ២ គ្រឿង និងប្រាក់ ១គ្រឿង មិត្តភាពដណ្តើមបានមេដាយមាស ២ គ្រឿង និងខេត្តកោះកុងដណ្តើមបានមេដាយសរុប៦គ្រឿងរួមមានមេដាយមាស ១ គ្រឿង ប្រាក់ ១គ្រឿង និងសំរិទ្ធ ៤ គ្រឿង៕
ដោយ ៖ គោព្រៃ