ឃីម បូរ៉ា មិនទទួលការប្រកួតជាប់អាទិត្រ ទុកពេលត្រៀមខ្លួនសំលៀងអាវុធស្វាគមន៍ ពេជ្យ សម្បត្តិ
ប្រដាល់ ៖ ដោយសារតែមានការផុសផ្គូផ្គង ពីបណ្តាលផេកអ្នកគាំទ្រប្រដាល់ជាច្រើន នឹងពេលកន្លងទៅ ពេជ្យ សម្បត្តិ ក៏ធ្លាប់ចេញមុខ និយាយថា ចង់ប៉ះសិស្សច្បង ឃីម បូរ៉ា ដើម្បីដកស្រង់បទពិសោធន៍ រៀនសូត្រផងនោះ ។ ប៉ុន្តែកាលនោះបំណងចង់ជួប សិស្សច្បង មិនបានសម្រេចនោះទេ ក៏ព្រោះតែ ឃីម បូរ៉ា ជាប់ភារកិច្ចហ្វឹកហាត់ត្រៀមប្រកួតស៊ីហ្គេម ក្នុងនាមម្ចាស់ផ្ទះ ។
ឆ្លើយតបនឹងសំនួរនៅក្នុងបទសម្ភាសន៍តាមអនឡាញនាពេលថ្មីៗនេះ ឃីម បូរ៉ា បានអោយដឹងថា «តាំងពីបញ្ចប់បេសកកម្មដណ្តើមមេដាយជូនជាតិ ពីព្រឹត្តិការណ៍កីឡា ស៊ីហ្គេម លើកទី៣២ ឆ្នាំ២០២៣កន្លងមកដល់ពេលនេះ ខ្លួនទើបតែឡើងសង្វៀនបាន៣ប្រកួតប៉ុណ្ណោះដែលធ្វើអោយរូបគេ គិតថា ជាចំនួនប្រកួតដែលតិចតួច ។ ចំពោះការចេញប្រកួតតិចបែបនេះ ត្រូវបានឃីម បូរ៉ា ទម្លាយថា ដោយសារស្ថានីយទាក់ទងមកអោយឡើងប្រកួតជាប់អាទិត្រ ដែលធ្វើអោយរូបគេ មិនអាចទទួលយកការប្រកួតនោះបាន ព្រោះការប្រកួតញឹកញ៉ាប់ជាប់អាទិត្របែបនេះ អាចធ្វើអោយការត្រៀមខ្លួនមិនសូវបានល្អ អាចធ្វើអោយកម្លាំងមានការធ្លាក់ចុះ ម្យ៉ាងវិញទៀតបារម្ភណ៍ ខ្លាចខូចដៃ ខូចជើង នាំតែពិបាកតែខ្លួនឯង » ។
ចំពោះការប៉ះពេជ្រ សម្បត្តិ ត្រូវបានឃីម បូរ៉ា បញ្ជាក់ថា ជាការពិតនាពេលឆាប់ៗខាងមុខនេះ ។ បើទោះបីលឺដំណឹងថា ពេជ្រ សម្បត្តិ សមត្ថភាពមានការកើនឡើងខ្លាំងយ៉ាងណាក្តី ប៉ុន្តែសម្រាប់ឃីម បូរ៉ា មិនបានខ្វាយខ្វល់តាមដានការប្រកួតរបស់ដៃគូនោះទេ ដោយអ្នកប្រដាល់លំដាប់ជួមុខ ក្នុងប្រភេទទម្ងន់៦០គីឡូ រូបនេះ និយាយថា អ្វីដែលខ្លួនត្រូវធ្វើគឺការខិតខំប្រឹងប្រែងហ្វឹកហាត់អោយបានគ្រប់គ្រាន់គឺប៉ះនាក់ណាក៏បាន សំខាន់ចាំសិក្សាដៃគូប្រកួតពេលឡើងសង្វៀនតែម្តង ។ អ្នកប្រដាល់ល្អគ្រប់គ្រឿងរូបនេះ បញ្ជាក់ថា «មូលហេតុដែលរូបគេមិនខ្វល់តាមដានដៃគូមុនប្រកួត ចាំសិក្សាផ្ទាល់លើសង្វៀន ព្រោះកីឡាករខ្លះ ពេលប្រកួតកន្លងទៅប្រើបច្ចេកទេសផ្សេង តែពេលជួបយើងគេប្រើបច្ចេកទេសផ្សេង បើយើងផ្តោតតែលើក្បាច់ដែលគេធ្លាប់ប្រកួតរាល់ដង នោះអាចនឹងធ្វើអោយយើងពិបាកទប់ទល់ជាមួយគេ »។សម្រាប់ការប្រកួតមួយនេះជួបខ្មែរដូចគ្នាក៏ដោយ ក៏ឃីម បូរ៉ា ប្តេជ្ញានឹងខិតខំអោយអស់ពីសមត្ថភាព មិនធ្វើអោយអ្នកគាំទ្រខកចិត្តនោះទេ ។
សូមបញ្ជាក់ថា អ្នកប្រដាល់រហ័ស្សនាម នាគមាស ឃីម បូរ៉ា មកពីខេត្តបន្ទាយមានជ័យ នឹងត្រូវជួបតតាំងជាមួយក្របីព្រៃ មុខដែក ពេជ្រ សម្បត្តិ ជាអ្នកប្រដាល់មកពីខេត្តកំពង់ស្ពឺ ប្រកួតលក្ខណៈគុនខ្មែរ៥ទឹក ១ទឹក៣នាទី ក្នុងប្រភេទទម្ងន់៦០គីឡូក្រាម ប្រើហ្គង់ធំធម្មតាដណ្តើមខ្សែក្រវ៉ាត់គ្រុឌគុនខ្មែរ នាសង្វៀនទូរទស្សន៍ជាតិ នៅថ្ងៃទី៣ ខែកញ្ញាខាងមុខឆាប់ៗនេះ ។ ចំពោះការប៉ះគ្នានេះជាការប្រកួតដាក់ខ្សែក្រវ៉ាត់ ប្រសិនបើអ្នកណាឈ្នះនឹងទទួលបានខ្សែក្រវ៉ាត់គ្រុឌ២ យកទៅស្ពាយតែម្តង ៕
អត្ថបទ ៖ គោព្រៃ