ប្រដាល់គុនខ្មែរ ជួយឲ្យ ខាំ ខ្លានាង ប្រែពីជីវិតកម្មករ ក្លាយជាអ្នកប្រដាល់លំដាប់ជួរមុខ នៅកម្ពុជា
អ្នកប្រដាល់គុនខ្មែរ ខាំ ខ្លានាង មានឈ្មោះពិត ណុប នាង វ័យ១៧ឆ្នាំបានចូលប្រឡុក ក្នុងវិស័យកីឡាប្រដាល់ក្នុងឆ្នាំ២០១០ ចំណែកឯកម្រិតសិក្សាត្រឹមតែថ្នាក់ទី៣ប៉ុណ្ណោះ ។ មុនក្លាយជាអ្នកប្រដាល់គុនខ្មែរ ខ្លានាង មានជីវភាពលំបាកយ៉ាងខ្លាំង ធ្លាប់ធ្វើជាកម្មករសំណង់ កម្មករលីឈើ កម្មករឡឥត និងធ្លាប់មានប្រវត្តិជាក្មេងសេបគ្រឿងញានទៀតផង ។ ប៉ុន្តែដោយសារតែ ជីវិតជាកម្មកររកបានប្រាក់កម្រៃតិចតួច ខ្លានាង បែរមកចាប់អាជីពជាអ្នកប្រដាល់គុនខ្មែរ ដោយហ្វឹកហាត់ក្នុងក្លិបប្រដាល់រហាត់ស្វាយប៉ាក ក្នុងឆ្នាំ២០១០ ក្រោមការបង្ហាត់ពីលោកគ្រូ បឺត សំខាន់ និងជាបងថ្លៃផងដែរ ។
ក្នុងអាជីពជាអ្នកប្រដាល់គនុខ្មែរ ខាំ ខ្លានាង បានឆ្លងកាត់សង្វៀនជាច្រើនជាមួយអ្នកប្រដាល់ខ្មែរ និងកីឡាករថៃផងដែរ ចាប់តាំងពីតម្លៃខ្លួន ១៥ពាន់រៀល ៦ម៉ឺនរៀល ៤៥ម៉ឺនរៀល រហូតដល់១លាន ក្នុងឆ្នាំ២០១៧ ។ ប្រកបអាជីពជាអ្នកលេងក្បាច់គុនលើសង្វៀនរយៈពេល៨ឆ្នាំ បានធ្វើឲ្យខ្លានាង មានលទ្ធភាពកសាងគ្រួសារតូចមួយ ដោយបានរៀបចំជាមួយប្អូនគ្រូបង្វឹករបស់ខ្លួន បឺត សំខាន់ ។
ចន្លោះឆ្នាំ២០១៧ ដល់ឆ្នាំ២០២១នេះ ខាំ ខ្លានាង បានក្លាយជាអ្នកប្រដាល់ជើងខ្លាំងពិបាករកគូប្រកួត ក្នុងប្រភេទទម្ងន់ស្រាល៥១គីឡូក្រាម និងទទួលបានតម្លៃខ្លួនមិនក្រោម៥០០ដុល្លារអាមេរិកនោះទេ ។ ប៉ុន្តែតម្លៃខ្លួននេះមិនបានជួយឲ្យជីវភាព ខ្លានាង ធូធារនៅឡើយទេ ដោយមិនទាន់មានលទ្ធភាពទិញបានផ្ទះសម្រាប់គ្រួសារដែលមានកូនស្រីតូចៗ២នាក់ក្នុងបន្ទុក ហើយបច្ចុប្បន្នកំពុងស្នាក់អាស្រ័យជាមួយលោកគ្រូ និងជាបងថ្លៃ បឺត សំខាន់ ។ មូលហេតុដែលមិនអាចទិញផ្ទះបាន និងត្រូវចំណាយ ច្រើនលើជីវភាពប្រចាំ បូករួមទាំងកូនៗផងនោះ ពីពីព្រោះប្រភេទទម្ងន់ ខ្លានាង ពិបាករកគូប្រកួត ដោយ ពី២ទៅ៣ខែ ទើបបានឡើងសង្វៀនមួយម្តង ។
ភាពល្បីល្បាញ និងមិនសូវមានគូប្រកួត មិនបានធ្វើអោយជីវភាពធាធូក្តី ប៉ុន្តែ ខាំ ខ្លានាង នៅ តែបន្តខិតខំហ្វឹកហាត់បង្កើនសមត្ថភាព ដើម្បីសម្រេចមហិជ្ជតាដណ្តើមកៅអីជម្រើសជាតិគុនខ្មែរ នៅឆ្នាំ ២០២១ ឆ្ពោះទៅដណ្តើមមេដាយមាសជូនកម្ពុជា ពីព្រឹត្តិការណ៍កីឡាស៊ីហ្គេម លើកទី៣១ នៅប្រទេស វៀតណាម និងបន្តបោះជំហ៊ានរក្សាតំណែងជាជម្រើសជាតិដណ្តើមមេដាយមាស នៅស៊ីហ្គេម លើកទី៣២ ដែលកម្ពុជាធ្វើជាម្ចាស់ផ្ទះ ។
សូមបញ្ជាក់ថា អ្នកប្រដាល់ទម្ងន់រុយជួរមុខនៅកម្ពុជា ខាំ ខ្លានាង មានបងប្អូនប្រុសស្រី៩នាក់ និងជាកូនទី៦ មានអាយុ២៨ឆ្នាំ កើតនៅរាជធានីភ្នំពេញ ស្ថិតនៅសង្កាត់ស្វាយប៉ាក ខណ្ឌ ឬស្សីកែវ ។ អ្នកប្រដាល់ទម្ងន់ស្រាលរូបនេះ បានចូលប្រឡុកជាប្រដាល់គុនខ្មែរ ក្នុងឆ្នាំ២០១០ រហូតមកដល់ឆ្នាំ២០២១ ៕