ក្លឹបប៊ីយ៉ា Lux98 ប្រកាសរៀបចំការប្រកួតពានរង្វាន់នារីជាលើកដំបូង

ភ្នំពេញ៖ ក្លឹបប៊ីយ៉ា Lux98 (Lux98 Billiards) ដែលមានទីតាំងស្ថិតនៅផ្លូវ៦១២ សង្កាត់ច្បារអំពៅ ខណ្ឌច្បារអំពៅ១ រាជធានីភ្នំពេញ បានប្រកាសពីការរៀបចំការប្រកួតកីឡាប៊ីយ៉ានារីលើវិញ្ញាសា POOL 9-BALL ពានរង្វាន់ Lux98 (LUX98-POOL 9-BALL Women 2024) ជាលើកដំបូង ដែលគ្រោងនឹងបើកដំណើរការប្រកួតនាថ្ងៃទី១២ ខែឧសភា ឆ្នាំ២០២៤។

កញ្ញា ហេង ចាង ប្រធានក្លឹបប៊ីយ៉ា Lux98 បានគូសបញ្ជាក់ថា នេះជាព្រឹត្តិការណ៍ពិសេសមួយ ដែលជាការប្រកួតប៊ីយ៉ានារីដំបូងគេនៅម្ពុជាធ្វើឡើងនៅក្លឹប Lux98 Billiards ក្នុងកិច្ចខិតខំប្រឹងប្រែងដើម្បីជំរុញឱ្យមានការចូលរួម និងការយល់ដឹងពីតួនាទីរបស់ស្ត្រី ក្នុងវិស័យកីឡា ក៏ដូចជាមានឆន្ទៈដ៏មោះមុត ក្នុងការរួមចំណែកអភិវឌ្ឍវិស័យកីឡាប៊ីយ៉ាជាមួយសហព័ន្ធកីឡាប៊ីយ៉ាកម្ពុជាឱ្យកាន់តែរីកចម្រើនផងដែរ។

ប្រធានក្លឹបរូបនេះបន្ថែមថា ព្រឹត្តិការណ៍កីឡានេះត្រូវបានរៀបចំឡើងយ៉ាងពិសេស ដើម្បីជួយឱ្យកីឡាការិនីទទួលបានបទពិសោធន៍នៃបរិយាកាសការប្រកួត និងបង្កើតកន្លែងប្រកួតប្រជែងដ៏គួរឱ្យទាក់ទាញ។ ការប្រកួតនឹងបើកការចុះឈ្មោះសម្រាប់អ្នកលេងប៊ីយ៉ាជានារីមកពីទូទាំងប្រទេស ដែលផ្តល់ឱកាសឱ្យពួកគេមិនត្រឹមតែប្រកួតប្រជែងប៉ុណ្ណោះទេ ថែមទាំងមានឱកាសភ្ជាប់ទំនាក់ទំនង និងស្វែងយល់ពីគ្នាទៅវិញទៅមកផងដែរ។

ក្លឹប Lux98 Billiards សង្ឃឹមថានឹងនាំមកនូវបទពិសោធន៍ ដែលមិនអាចបំភ្លេចបានដល់អ្នកលេង និងអ្នកទស្សនា ដែលមានបំណងចង់ឱ្យមានការត្រួសត្រាយលើការប្រកួតកីឡាប៊ីយ៉ានារី ក្នុងជំនាញវិជ្ជាជីវៈ ដោយការប្រកួតនេះមានប្រាក់រង្វាន់សរុបជាង ៣លានរៀល រួមជាមួយនឹងពានរង្វាន់ និងមេដាយផងដែរ។ កញ្ញា ហេង ចាង បានសង្កត់ធ្ងន់ថា យើងមានមោទនភាព និងរំភើបជាខ្លាំងចំពោះព្រឹត្តិការណ៍នេះ ក្នុងគោលបំណងសំខាន់ គឺបង្កើតជាឆាកមួយដែលអត្តពលិកនារីអាចបង្ហាញពីជំនាញ និងចំណង់ចំណូលចិត្តរបស់ពួកគេប្រកបដោយមោទនភាព ហើយក៏ជាឱកាសដ៏ល្អមួយមិនត្រឹមតែដើម្បីតែការអបអរសាទរទេពកោសល្យនារីប៉ុណ្ណោះទេ ប៉ុន្តែក៏ដើម្បីបំផុសគំនិតអ្នកដទៃឱ្យបានចេញមកចូលរួម។កីឡាការិនី ដែលមានទេពកោសល្យប្រមូលផ្តុំគ្នា នៅទីក្រុងភ្នំពេញសម្រាប់ការប្រកួតប៊ីយ៉ាពិសេស នៅ Lux98 Billiards ដែលជាកន្លែងលេងប៊ីយ៉ាឈានមុខគេក្នុងទីក្រុងភ្នំពេញ ដើម្បីផលិតធនធានកីឡាការិនីប្រចាំពានរង្វាន់នេះ ក៏ដូចជាសម្រាប់ជាតិផងដែរ។ ការពង្រឹងតួនាទីកីឡាការិនីក្នុងវិស័យកីឡាប៊ីយ៉ាកម្ពុជា គឺការប្រកួតនារីនៅ Lux98 ភ្នំពេញ ជាមជ្ឈមណ្ឌលកីឡាប៊ីយ៉ាដ៏ល្បីមួយនៅក្នុងទីក្រុងភ្នំពេញកំពុងធ្វើឱ្យមានការចាប់អារម្មណ៍យ៉ាងខ្លាំងដោយការរៀបចំការប្រកួតសម្រាប់តែស្ត្រីនៅក្នុងប្រភេទកីឡា ដែលគេស្គាល់ថាជាប្រពៃណីសម្រាប់ភាពលេចធ្លោខាងផ្នែកបុរស។

គួរបញ្ជាក់ថា ការប្រកួតពានរង្វាន់ LUX98-POOL 9-BALL Women គ្រោងនឹងបើកឱ្យដំណើការប្រកួតនាថ្ងៃទី១២ ខែឧសភា ឆ្នាំ២០២៤ នៅក្លឹប LUX98 ស្ថិតនៅផ្លូវ៦១២ សង្កាត់ច្បារអំពៅ ខណ្ឌច្បារអំពៅ១ រាជធានីភ្នំពេញ។ ព្រឹត្តិការណ៍នេះនៅតែបន្តការចុះឈ្មោះរៀងរាល់ថ្ងៃរហូតដល់ថ្ងៃទី១១ ខែឧសភា ឆ្នាំ២០២៤។ សម្រាប់តម្លៃនៃការចុះឈ្មោះគឺមិនគិតថ្លៃ អាចទំនាក់ទំនងសាកសួរព័ត៌មានតាមទូរស័ព្ទ +855 88 889 9678៕