Liverpool ចូលរួមប្រជែង Bayern Munich, Juventus និង Barcelona ដើម្បីចុះហត្ថលេខាលើខ្សែបម្រើការពារពីក្រុម Borussia Monchengladbach

ក្រុមហង្សក្រហម Liverpool ចាប់អារម្មណ៍ក្នុងការចុះហត្ថលេខាលើកីឡាករ Denis Zakaria របស់ក្លឹប Borussia Monchengladbach ហើយបានកំណត់គោលដៅនាំយកខ្សែបម្រើការពាររូបនេះ នៅខែមករានេះខាងមុខ នេះបើយោងតាមការចុះផ្សាយរបស់ Daily Mail Sport នៅថ្ងៃទី៩ ខែធ្នូនេះ ។

កីឡាករវ័យ ២៥ ឆ្នាំរូបនេះ កាលពីពេលកន្លងទៅត្រូវបានផ្សារភ្ជាប់ជាមួយនឹងការផ្លាស់ទៅ Anfield ដោយក្រុមរបស់លោក Jurgen Klopp នឹងប្រឈមមុខការប្រជែងពី Bayern Munich, Barcelona និង Juventus សម្រាប់ចុះហត្ថលេខាលើកីឡាកររូបនេះ ។
ហើយហង្សក្រហមត្រូវបានគេយល់ថាជាក្រុម នាំមុខគេ សម្រាប់ការប្រជែងយក ខ្សែបម្រើការពាររូបនេះ ។

សូមរំលឹកថា Zakaria កីឡាករសញ្ជាតិ ស្វីស នឹងផុតកុងត្រានៅរដូវក្តៅ ដោយធ្លាប់លេងជាមួយ Servette ហើយបានបន្តចុះហត្ថលេខាឱ្យក្លឹបយក្សស្វីស Young Boys មុនពេលធ្វើដំណើរទៅកាន់ក្របខ័ណ្ឌ Bundesliga ។ ចាប់តាំងពីផ្លាស់ទៅ Monchengladbach កីឡាករវ័យ ២៥ ឆ្នាំរូបនេះបានបង្ហាញខ្លួនចំនួន ១៣៨ ដងក្នុងការប្រកួតទាំងអស់ និងជាខ្សែបម្រើសំខាន់នៅក្នុងក្រុម ៕